Diyarname
Yekemîn car e malpereke kurd malpereke din a kurd dike mijara manşeta xwe. Fermo sedema vê yekê:
Gelek malperên kurd ji çapemeniya biyanî nûçe digirin, wergiderînin û diweşînin. Gelek caran bêyî çavkaniyê jî diyar bikin. Bi xwe nûçeyê çênakin/nikarin çêbikin. Bi vê yekê dişibin rojnameyên biyaniyan.
Gelek malperên kurd jî hema çi bê ber destê wan digirin û diweşînin. Bêyî ku bixwînin, bêyî ku binirxînin, bêyî lêpirsînekê li ser bikin. Mînak maileke li ser derketina pirtûkek hatiye, malperên me jî bêyî lêbipirsin wê digirin, diweşînin. Lê ger pirtûkek wisa derneketibe û nivîskar we xapandibe? Carinan jî ji van mailan tiştên ecêb derdikevin. Mînaka vê ecêbiyê ya dawî malpera Avestakurd e.
Em bên ser mijarê:
Weşanên Ava pirtûka çîrokan a Ronî War bi navê "Kuçeçîrok" weşand. Ronî War ji malperên kurdan re (ji Diyarnameyê re jî; nûçeya me çêkiriye li jêr e) mail şandiye.
Ji van malpera Avestakurd ew mail hema girtiye, bêyî bixwîne, bêyî binêre ka çi dibêje, bêyî li ser lêpirsînekê bike bi vê awayî weşandiye:
"Ji weşanxaneya AVA pirtûkeke nuh bi navê KUÇEÇÎROK derket...
05 Cotmeh 2010 Sêşem Saat 19:39
Avestakurd- Pirtûk ji çîrokan pêk tê û nivîskarê wê Ronî WAR e. Heger hûn di malperê de cih bidinê emê kêfxweş bibin."
Yanê nota ku Ronî War ji wan re şandiye jî pêre weşandine.
Bala xwe bidinê di notê de wisa dibêje: "Hûn di malperê de cih bidinê emê kêfxweş bibin."
Ronî War ev yek ji Avestakurd re, Avestakurd jî ev yek ji xwendevanan re gotiye!?
Herhal li dinyayê yekemîn car e tişteke wisa dibe. Em ji bo vê nûbûnê malpera Avestakurdê pîroz dikin ku rêgezeke nû xiste nav rojnamegeriya kurdî. Û ji ber dîtina rêgezeke nû ya ji bo çapemeniya kurd em îro Avestakurdê dikin mijara manşeta xwe.
Ma mirov tiştên herî nû û herî girîng nakin manşet? Me jî wisa kir!
**
.jpg)
