Diyarname

Rojnameya Xwebûnê hejmara xwe ya 5'an pêşkêşî xwedevanên xwe kir. Rojnameyê gotina zimanzan Zana Farqînî a wekî "Zarok êdî bi kurdî mezin nabin" kiriye manşeta xwe.

Rojên 11-12'yê vê mehê li Amedê bi beşdariya dor 300 kesên bi ziman û çandê re eleqedar Kombexata Tora Ziman û Çanda Kurdî li dar ket. Ev xebat bi hevpeyvîn û nivîsan di vê hejmara rojnameya Xwebûnê de cihek fireh girtiye. Di vê çarçoveyê de rojnameger Bilal Guldem ligel zimanzan Zana Farqînî hevpeyvînek kiriye û hevpeyvîn bûye manşeta rojnameyê. Farqînî qala girîngiya Tora Ziman û Çanda Kurdî sekiniye û wiha gotiye: “Ez wekî kesek li ser ziman dixebitim, di van xebatan de dertê holê ku em ziman û çanda xwe derbasî nifşên nû nakin. Em nikarin emanetê me ji dê û bavê stendiye bidine zarokên xwe. Zarokên me bi zimanê xwe mezin nabin û ranabin.”

Nivîskar Samî Tan têkildarî ‘Tora Ziman û Çanda Kurdî’ tesbîtên girîng pêşkêş kirine û Zekî Gorur jî çavdêriyên xwe yên dema komxebatê nivîsandine. 

Rojnameger Qedrî Esen di nûçe-analîza xwe de polîtîkayên li hemberî zimanê kurdî girtiye dest.

Di vê hejmarê de jî qunciknivîskarên rojnameyê bi nivîsên xwe di rojnameyê de cih girtiye. Ji wah Zehra Mohammedzadeh di gotara xwe de balkişandiye ser roja jinan a di çanda rojhilatê Kurdistanê de.

Di rojnameyê de nivîs û nûçeyên cur bi cur ên din jî cih girtine. 

Her wiha Mizgîn Ronak, Yildiz Çakar, Selîm Temo, Felemez Ulug, Sedat Ulugana, Şener Ozmen, Agît Yazar bi nivîsên xwe ked dane rojnameyê.