Diyarname
Kovar Tîrojê hejmara xwe ya nû derxist. Kovarê di vê hejmarê de li ser "Ezmûna rojnamegerî ya li ser pirsgirêka kurd" dosyaya xwe amade kiriye.

Kovara Tîrojê ku du mehan carekê bi kurdî tirkî weşana xwe dike hejmara xwe ya 46'an derxist. Di hejmara rezber-kewçêr a kovarê de nivîsên cur bi cur cih girtine. Kovar ku her hejmarê dosyayeke amade dike di vê hejmara xwe de dosyaya xwe li ser "Ezmûna rojnamegerî ya li ser pirsgirêka kurd" amade kiriye.
Di dosyayê de rojnamegerên wekî Adil Zazonî, Îrfan Aktan, Mehmet Aslanoglu, Naci Sapan, Ahmet Tulgar, Fatih Polat, Mujgan Arpat, Kamil Tekin Surek û Ragip Zarakoglu bi nivîsên xwe fikrên xwe anîne ziman. Di dosyayê de nêzîktêdayîna çapemeniya Tirkiyeyê ya li hemberî kurdan, pirsgirêka kurd fikir anîne ziman û mînak hatine dayîn.

Fehim Işik ku demekî berî çûbû Başûr çavdêriyên xwe yên li ser Başûr di bin sernavê "Hin têbiniyên gera Kurdistana Iraq"ê weşandiye. Di vê serdema ku li Tirkiyeyê careke din serdema perwerdehiya dibistana dest pê dike de Adar Jiyan li ser vê perwerdehiyê û pirsgirêkên wê bi sernavê "Li Tirkiyeyê pirsgirêkên perwerdehiyê" nivîsa xwe weşandiye. Şengul Ogur jî bi çîroka xwe ya bi navê "Gulçîçek û Xelatê" ya di tehma çîrokên gelêrî de beşdarî vê hejmara kovarê bûye.

Di beşa hevpeyvînan de jî Cemil Oguz bi dengbêj Mihemedê Serhedî re hevpeyvîneke kiriye. Serhedî ku albuma xwe ya nû bi navê "Şilor" derxistiye li ser dengbêjiya xwe û denbgêjiya kurdan, li ser albuma xwe û klaman dîtinên xwe aniye ziman.

Kesên wekî Arif Altan, Sennur Sezer, Cuma Boynukara, Nevzat Onaran, Cîhan Roj, İbrahim Genç, Ayşe Tepe, Yilmaz Ayyildiz, Cuneyt Yeşilyurt, Sibel Ozbudun, Şengul Karadaf, Serpil İlgun, Mehmet Bayrak, Lokman Polat, Rohat Alakom, Gulsen Odabaşi, Bariş Avşar bi nivîsên xwe, Şêxmûs Sefer, Mesut Serfiraz û Şînya bi helbestên xwe beşdarî kovarê bûne.