STENBOL
Hevserokê BDP'ê Selahattîn Demîrtaş, di mîtînga 'boykot'ê ya Stenbolê de derket pêşberî 10 hezaran û diyar kir ku "En dînên Tirkiyeyê" ne bêçare ne û nebûne esîrê faşîsmê. Demîrtaş got ziman ku piştî 12'ê Rezberê çi ji sindoqê derdikeve bila derkeve dê dîsa "boykot" bi ser bikeve û ev lê zêde kir: "Rihê Kenan Evren li pişt Tayyip Erdogan e. Serokwezîr dixwaze bi vê pakêtê rihê Evren dirêj bike."
Eniya Boykotê ya Bindest û Kedkaran, li Qada Çaglayan bi hişyariya "Em di 12'ê Rezberê de naçin ser sindoqê. Em destûrek bingehîn a demokratîk û çareseriyek demokratîk dixwazin" pêk anî. Di mîtîngê de bi 10 hezaran kes amade bû. Li gel barana zêde barî û 5 cîhên kontrolê lêgerînê dîsa ji çar aliyê Stenbolê bi 10 hezaran kesî herikî qada mîtîngê. Mîtîng bi axaftina Seroka Komîteya Amadekar Hulya Yer dest pê kir. Pişt re nûnerên "Eniya Boykotê" derketin ser dikê û silav dan girseyê. Paşê nûnerên partî û saziyan kevokên aştiyê firandin. Seroka Giştî ya ESP'ê Fîgen Yuksekdag û Parlementera BDP'ê ya Stenbolê Sabahat Tuncel jî sedema çima boykot û çima naçin ser sindoqê vegotin.
EM NE JI BÊÇARETIYÊ BOYKOT DIKIN
Di mîtîngê de herî dawî Hevserokê BDP'ê Selahattîn Demîrtaş derket ser dikê û Serokwezîr Erdogan û Serokê Giştî yê CHP'ê Kiliçdaroglu bi zimanekî tûj rexne kir. Demîrtaş, anî ziman ku hişmendiyên antîdemokratîk Tirkiye neçarî 'Erê' û 'Na' hiştine û welatiyên demokrat û azadîxwaz ne neçar in ku 'erê' an 'na'yê bikar bînin. Demîrtaş got ku alternatîfa wan 'boykot' e û xwest ji bo mafên mirovan, destûra bingehîn a demokratîk, welatekî demokratîk, nasname û çanda demokratîk tu kes neçe ser sindoqan. Demîrtaş, xwest kesên dibêjin "Ez heme û naxwazim bêm înkarkirin" divê neçin ser sindoqan û wiha axivî: "Li Tirkiyeyê 'ên din' ne bê çare ne. Çare boykot e. Em ji bo hevî û demokrasiyê di riyan de ne û têdikoşin. Em ji çanda têkoşîn û raperînê tên. Heta niha me serî netewand, ji niha û şûnde jî em dê serî netewînin. Em ê têkoşîna xwe ya mirovahiyê û rûmetê bidomînin. Ji ber ku li Tirkiyeyê eniya têkoşîna demokrasî û aştiyê heye, ji sindoqê çi derdikeve bila derkeke dê dîsa boykot û azadî bi ser bikeve."
RIHÊ EVREN LI DOR ERDOGAN DIGERE
Demîrtaş, bang li Serokwezîr û Kiliçdaroglu kir, xwest êdî dest ji xapandina gel berdin. Demîrtaş, anî ziman ku êdî gel hişyar bûye û dibêje êdî bes e. Demîrtaş, destnîşan kir ku tu cudatiya Serokwezîr, Kiliçdaroglu û Kenan Evren ji hev tune û wiha got: "Rihê Kenan Evren li pişt Tayyip Erdogan e. Serokwezîr dixwaze bi vê pakêtê rihê Evren berdewam bike. Kiliçdaroglu jî dixwaze bi statuko û kevneperestiya xwe rihê Evren bidomîne. Tu cudatiya wan ji hev tune. Divê gel biryara makeqanûna nû bide. Makeqanûna ku li Enqereyê bê amadekirin nabe demokratîk. Divê di makeqanûna nû de mafê bindestan, kedkar û karkeran, lazan, kurdan, çerkezan, tirkan bê parastin. Ji ber ku ev maf tune em dibêjin Boykot."
Demîrtaş diyar kir ku Serokwezîr Erdogan li Amedê mizgîniya girtîgehek nû daye amediyan û ev nîşana girtin û antîdemokrasiyê ye. Demîrtaş, mizgîniya Erdogan a girtîgeha nû bi zimanekî tûj rexne kir û wiha got: "Ger ku tu mirovekî demokrat bî te mizgîniya girtîgeha nû nedida gelê Amedê. Ger ku tu demokrat ba te dê Zindana Amede bida gel. Dê wir biba malê gel û muzeya demokrasiyê."
Selahattin Demîrtaş, bang li Serokwezîr Erdogan kir û got ku dil û wêrekiya wî hebe, dê piştî 12'ê rezberê ji bo projeya aştî û demokrasiyê bi wan re li hev rûnê. Demîrtaş, gefên li ser gel jî rexne kir û anî ziman ku li her derê rayedarên dewletê û qeymeqamên navçeyan zextê li gel dikin û dixwazin bi zorê biçin ser sindoqan.
Mîtîng piştî axaftinan muzîkê û komên NÇM'ê bi dawî bû.
***
Nûçeyên eleqedar:
- Vaye axaftina Baydemîr a di mîtînga Amedê de
- Demirtaş: Bendav dakeve emê 80 mebûsî bişînin meclisê
- Hûn nikarin di pankartê de vê binivîsin!
- Ji devê Demirtaş vane şertên BDP'ê
- Baydemir: Boykot eniya alternatîf e
.jpg)
.jpg)
.jpg)
.jpg)
