Diyarname

Helbestvanê mezin Arjen Arî ji salan berê helbesta we ya bi navê "Efendîno" nivîsandiye. Niha hemû pirtûkên wî wekî setek ji Weşanên Sor derketin. Û helbesta wî ya "Efendîno" ji bo her demê bersivek e. Em niha wê stranê pêşkêşî we dikin. Fermo:

EFENDÎNO

Arjen Arî

Rahijin teşkên xwe

rahijin kincên xwe, postalên xwe û şivqeyên xwe

çiyê we hebe li ser vê axê û we çi anîbe bi xwe re:

tenq, top, tiveng, teyare...

û we çi ava kiribe: dibistan, qereqol, dadgeh

û hepsên bêdergeh, zîndan û asaqgehên têrguneh

û jinên xwe jî esseh efendîno, zarûyên xwe jî:

hebe pîç û bêjiyên ji xwe jî

û kûçikên xwe jî bibin, pisîk û çivîkên xwe jî

û ala xwe jî ji bîr mekin efendîno, ala xwe jî

tiştekî, tiştekî nehêlin ji kerema xwe...

hûn ê biçin

hûn ê pişta stûyê xwe bixurînin û biçin

hûn ê biniçniçin û hûn ê biçin!

biçin: berî kuç û kevir di we werbin

biçin. berî ku dtayikên kitanspî tû bikin ser çavên we

û hêj kû agir vêneketiye j'agir:

hima niha, vê kêlîkê, ji vir

rahijin teşkên xwe

û biqeşitin ji vir, efîndîno!

hûnê biçin efendîno, hûnê biçin

berî ku hûn bisekitin se se

hima rahijin teşkên xwe

û biqeşitin!

Ji dîwana "Payîza Peyvê"