Ferîd Mîtan / Diyarname / Qamişlo

Yekîtîya Nivîskarên Kurdistana Sûriyeyê (YNKS), xelata xwe ya salane ku ji çar salan ve hatiye damezrandin, da romannivîsa kurd Bêwar Birahîm.

Nîvroja îroj duşemê û li navenda xwe ya li bajarê Qamişloyê, YNKS’ê bi rê û resmeka fermî navê xelatgira 2019’an wekî Bêwar Birahîm ragihand.

Der barê mekanîzma û çalakiya xelatdayînê da, Berpirsê Giştî yê Ragihandina YNKS’ê, Mihemed Ebdê, bi daxuyaniyeke taybet ji Diyarnameyê ra mercên xelatdayinê wiha rêz kirin: “Kesê/a xelatgir divê bi kurdî binivîse, di warê berhemdayînê de xwediyê kedeke berbiçav be û li rojavayê Kurdistanê bijî.”

Xelatgira YNKS’ê, Bêwar Birahîm, ji Diyarnameyê ra da zanîn ku her çiqas ev xelata han sembolîk e jî, “lê piştevanîyeka gelekî xurt e ku bi saya wê mirov bêhtir handêr dibe û pêngavine berztir diavêje.”

Xelata YNKS’ê ji 2016’an ve hatiye ragihandin; Di sala 2016’an de dan helbestvan Ehmedê Şêx Salih, 2017’an de helbestvan Ferhadê Içmo û di sala 2018’an de jî dan nivîskar Merwan Berekat.

Bêwar Birahîm sala 1973’yan li gundewarê Qamişloyê hatiye dinyayê. Ji 1990’î ve dest bi nivîsînê kiriye; du berhevokên wê yên helbestan “Bibûre hey evîn tu bê sûde yî” (1999) û “Nameyek ji bo Qederê” (2001) û romanek “Payizokine Çavşil ji Dilê Xewnê”, (2014, Lîs) hatine çapkirin û aniha romaneke wê ya nû “Werzên Birînên Mest” li Stenbolê li ber çapê ye. Her wiha  ji sala 2005’an ve heta 2012’yan nûneriya Navenda PEN’a Kurd li rojavayî Kurdistanê kiriye.