Silava Ebdulrehman / ANHA/QAMIŞLO
Hemû hejmarên kovara Hawarê ku Mîr Celadet Bedirxan li Şamê derdixist û bi zor û zehmetî dişand rojavayê Kurdistanê, niha li Qamişlo tê pêşkêşkirin.
Di bin diruşmeya ‘Civak dixwîne civak pêş dikeve’ roja 20'ê tîrmehê Pêşengeha Pirtûkan a Sêyemîn-Herekol li hola Zana ya bajarê Qamişlo li dar ket û heta 25'ê mehê didome. Li gorî komîteya amadekar hejmara pirtûkên ku hatine pêşkêşkirin 8 hezar û 500 pirtûk in.
Hemû hejmarên kovara Hawar jî wekî pirtûk di pêşengahê de cihê xwe girtin. Pirtûk ji hezar û 100 rûpelan pêk tê.
Hoşeng Nûh, berpirs û berdevkê Dar El-Zemen a çapkirin û weşanê yê ku beşdarî pêşangehê bûye, got: “Piştî wefata Mîr Celadet Elî Bedirxan kopiya kovarê di salên 80 û 90`î de berbelav bû. Piştre nivîskar Firat Cewerî yê ji bakurê Kurdistanê hat Rojava, li kopiyên kovarê yên li Şam û Helebê geriya, berhev kirin û vegerî Swêdê. Piştî wê hejmarên kovara Hawarê wekî pirtûkekê şand Rojava da ku di pêşengeha Herekol de were pêşkêşkirin.”
Nûh komkirina tevahiya hejmarên kovara Hawarê di pirtûkekê de û hebûna wê li Rojava mîna xewnê dibîne û dibêje: “Ji ber ku ji sala 1932'yan ve ev cara yekemîn e ku kopiyek çapkirî ji kovarê di pirtûkekê de digihîje Rojava. Pirtûk girêdayî destpêkirina rojnamegeriya kurdî lêvegerek dîrokî ya girîng e. Vegerandina kovara Hawarê ji cihê xwe yê bingehîn re cihê şanaziyê ye. Armanc ji anîna pirtûkê, xwendina fikrê Celadet Bedirxan, şîrove û analîzên wî ne. Her wiha sûd jê were girtin da ku têgihîştinek di navbera civakê de biafrînin, vegerin zimanê dayîkê û berhemên wê. Em ê ji bo lêkolînên xwe gelek sûd jê bigirin.”