Diyarname

Niha pêşbaziya 6'an a Arjen Arî ya Helbestan hat dest pê kirin lê berî vê ev kurtedemek e li ser pêşbsaziya 4'an nîqaş hebû di nav tora civakî de. Îdîa jî ew bû ku Narîn Yukler dosyaya xwe wergerandiye û şandiye. Îro malbata Arjan Arî ku ew jî di nav birêvebirên pêşbaziyê de ne daxuyaniyeke nivîskî belav kirin. Bêyî em dest bidinê em vê daxuyaniyê pêşkêşî we dikin:

**

"Daxuyaniyek mecbûrî ji malbata Arjen Arî  li ser îddîayên derheqê Pêşbirka Helbestan a Arjen Arî de 

Ev demeke em wekî malbat difikirin ka em bersiva rexneyên ku li ser medyaya civakî  ku  li ser Pêşbirka  Helbestan a li ser navê Arjen Arî li dar dikeve bidin an na.  Lê em gihane vê baweriyê ku ev îdîa û nîqaş bandoreke xirab li ser pêşbirka ku li dar dikeve dike ji ber wê jî daxuyaniyek bû ye pêdiviyek ji bo me. 

Galegal û gotinên ku ji juriya ku di ber kar û barên xweyî rojane de kedek dane vî karî de tê nivîsîn ji aliyê me ve nayê pejirandin. Berî hemû tiştî bi baweriya me mirov tiff nav rûyê xayînan dike, tu kesek ji endamên juriyê jî ne xayîn e.Wekî ku tê zanîn bi taybetî endamên juriya sala 2017'an û yên berî wê û yên  pistî wê jî  kesên xwedî kedeke mezin in di wêjeya kurdî de. (Ji bilî Necla Arî ku xwendevanek ji rêzê ye)

 Narîn Yukler dibêje "min helbestên xwe bi xwe wergerandine". Diziya kesekî nekiriye, helbestên kesekî /ê li ser navê xwe neşandine pêşbirkê bi qasî ku em dizanin. Heger endamên juriyê negihiştine baweriya ku ev helbest wergerin ev jî ji jêhatîbûna wergerê ye. Em dixwazin van rêzan ji e-maila Narîn Yukler ê ku wekî bersiva pirsên me ji me re rê kiribû bi were parve bikin, "piştî min xelat wergirt min dest ji nivîsîna tirkî berda. Gelek kovaran ji min helbestên tirkî xwestin, lê belê min ji wan re got ku, min dest ji nivisîna tirkî berdaye." (17.08.2018). Bi baweriya me armanca pêşbirkê piştî xwendina wê risteyê bi cî hatiye. 

Xelata li ser navê Arjen Arî helbestvanek ji zimanê tirki bi dûr xistiye, yek li zimanê kurdî zêde kiriye. Em baş dizanin ku Arjen Arî jî wê bi xwendina van rêzên Narîn Yuklerê bextewar biba. Bi hevoka Arjen Arî, Narîn Yuklerê jî "telaqê tirkiya kiriye destê wê" di warê helbestê de.

Wekî ku tê zanîn haya kesekî di juriyê de jê tuneye bê xwediyê dosyayan kî ne. Piştî ku endamên juriyê raya xwe eşkere dikin, navê xwediyê/a dosyaya yekemîn tê eşkere kirin. 

Bi qasî ku werger ne tercîh e di vê pêşbirkê de, "şertekî ku bibêje ku nivîskar helbesta xwe ji zimanekî din wergerîne kurdî nikare tevlê bibe" jî tune ye. Û di nirxandina dosyayan de welew ku wê wergerandibe jî haya kesî jê tune ye, ne pêkan e ku çêbibe jî. Wekî me got nav ne diyar in. Me rast û rê ji Narîn Yukler pirsiye ma helbestên ku wergerin berê çap bûne an na, bersiv ''Na'' ye.

Bi baweriya me pêşbirka ku li ser navê Arjen Arî li dar dikeve xizmetekê ji zimanê li ber dilê Arjen Arî  şêrîne re dike û handan e ji bo helbestvanên gencên kurd.

 Em wekî malbat û bi navê xwe yê berê, weşanxane û capxaneya  Evrenselê (ku ji destpêkê ve li vê pêşbirkê xwedî derketiye, paşê bi  KHK hatiye girtin) bi navê xwe yê nû Weşanên Sor, emê bi hev re vê pêşbirkê berdewam bikin, ji bo ku ev pêşbirk bê domandin malbat û Weşanên Sor tişta ji destê me bê em ê bikin. 

Îsal pêşbirka şeşemîn ji aliyê me û Weşanên SOR (ku weşanxaneyeke kurd e)  ve tê lidarxistin. Pirsa 'Bê çima dezgeh û weşanxaneyên din ên kurd di vê pêşbirkê de cî nagirin, lê xwedî dernakevin' bi baweriya me dikare ji wan bê pirsîn. Di 2013'yan de, gava cara yekemîn pêşbirk li dar ket çend dezgeh û weşanxaneyan têde cî girtibûn, hinek hatin girtin bi (KHK), hinekan jî xwe jê vekişand. Tu astengî li ber tu kesan, tu saziyan tune ye, heke bixwazin piştgiriya vê pêşbirkê bikin, lê xwedî derkevin.

Wekî encam di vê pêvajoya tund û zehmet ya ku em kurd têde ne, armanca vê pêşbirkê bi tenê xizmet e ji bo wêjeya kurdî.  Bi dîtina me ew dijayetî zirarê digihîne nirx û têkoşîna gelê me. Û bê hurmetiyek e li himberî  Arjen Arî û hezkiryên wî. 

Em wekî malbata Arjen Arî ji wê helwest û nêzikbûna dijayetîya tund xemgîn in û hêvî dikin her kes bi  berpirsyarî û pozitîf tev bigere. 

Li ser navê malbata Arjen Arî , xwişka wî Necla Arî,  kurê wî Behzat Brusk Arî"