Cemil Oguz

Îro pêşî Fransa derket nîv fînalê û paşê, di maça duyem de, di maça ku her kes li bendê bû de Belçîkayê Brezîlya şand mala xwe û ew derket nîv fînalê.

Favorî her gav ne favorî ye
Di maça duyem de Belçîka û Brezîlya hatin hemberî hev. Ji destpêka kûpayê ve heta niha û heta destpêka vê maçê Brezîlya favorî bû. Lê her favoriyên li ser kaxiz nayê wê wateyê dê di nav jiyanê de, di maçê de jî favorî bin. Her du aliyan jî êrîşên xwe kirin, her du aliyan jî xweş li gogê dan, her du aliyan jî kirin ku maçek xweş pêşkêşî cîhana fûtbolê bikin lê her gav dema zingilê deqîqeya nodî lê dide tenê yek serketî dimîne û îro ew jî Belçîka bû.
Belçîkayê herî dawî di sala 1963'yan de, ew jî di maçeke amadehî de Brezîlya têk biribû û ev 55 sal bûn ku serketinek din a Belçîkayê jî nîn bû.
Brezîlyayê heta niha tam 5 caran ev Kûpaya Cîhanê biribû mala xwe Belçîkayê nikaribû carek jî bibe mala xwe.
Li Brezîlyayê Neymarê lîstikvanê herî buha, yê navdar hebû. Pêre Fernandinho hebû, Marcelo hebû, hebû û hebû. Loma jî ew favorî dihat nîşan dayîn, lê kesî nedigot li aliyê din jî Hazard heye, Lukaku heye, Kevin De Bruyne heye, bi ser de jî keleparêz Courtois heye...
Erê, bi vî awayî maçê dest pê kir û di encamê de Belçîkayê nîşan da ku favorî her demê nefavorî ne. Courtois di keleha xwe de bûbû wekî piling, ji vir xwe diavêt wir û rê nedira golavêjin brezîlî.
Lukaku baz dide, Hazard baz dida û bi ser de Bruyne dilîst, wisa dilîst ku ji aliyê FIFA'yê ve wekî lîstikvanê maçê hat hilbijartin. Belê di deqîqeya 13'an de gol li Fernandinho ket û Belçîka 1-0 derket pêş. Brezîlyayê hê bi temamî ev şok bela welat nekiribû vê carê Bruyne derket ser dikê û encam anî 2-0. Nîveka yekemîn bi vî awayî bi dawî bû.
Di nîveka duyemîn de deqîqeya 76'an de Augusto bersiv da lê vê yekê têre nekir û Belçîka meşa xwe domand, Brezîlya vegeriya mala xwe.

Fransayê rê neda Ûrûgûay
Berî vê maça yekemîn a îro di navbera Fransa û Ûrûgûay de hatibûn lîstin. Fransayê bi 2-0 maç bi dest xistibû û derbasî nîv fînalê bûbû. Di deqîqeya 40'î de Varane, di deqîqeya 61'ê de jî Griezman li ser navê Fransayê gol avêtibûn. Griezman ji derveyî sehaya pêş kelehê li gogê da, keleparêzê Ûrûgûay Muslera ku li Tirkiyeyê li Galatasaray dilîze xetayek mezin kir û gog bi torê ve eliqî.
Bi vê encamê Fransa derbasî nîv fînalê bûbû û li benda reqîbê xwe bû, reqîbê wê bû Belçîka.
Belçîka û Fransa 10'ê mehê saet 21'ê de di nîv fînalê de ji bo fînalê dê bêne hemberî hev.

***

Nivîsên din ên  Cemil Oguz li ser Kûpaya Cîhanê ya 2018'an:

- Favorî her gav ne favorî ye: Belçîkayê Brezîlya jî şand mal 

- Çernîşevkî Rusya rakir piyan!

- Lehengên her du favoriyan li sehayê bûn û bi temamî 6 gol hebûn 

 ***

Ji bo agahiyên berfirehtir fermo rûpela me ya taybet:

- RÛPELA TAYBET A KÛPAYA CÎHANÊ 2018