Enqere
Heyeta Amedê îro bi Serokwezîr re hevdîtin pêk anî lê Serokê Baroya Amedê Sezgin Tanrikulu civîn terk kir.

Serokê Baroka Amedê Sezgin Tanrikulu bêyî civîn bi dawî bibe ji hevdîtina ku bi Serokwezîr Recep Tayyip Erdogan re dihat kirin derket û got; "Di hevdîtinê de gotinên ku wekî heqaret bûn hebûn. Ez parêzerim, kes nikare gotinên min bigire bin lêpirsînê, ji ber vê yekê ji bo ez zêde nekevim nav nîqaşê min civîn terk kir."

Piştî terkirina civînê Tanrikulu ji bo rojnamegeran got, "Gotinên wekî heqaretê bûn hebûn, ji ber ku min ev qebûl nekirin ez ji civînê derketim" û li ser pirsa "Çima xirecir derket?" jî wisa got; "Ez nizanim. Serokwezîr pir hêrsbûyî bû."

Tanrikulu got: "Ez ji kesî talîmatê nagirim. Kes nikare fikra min bigire bin lêpirsînê. Ez parêzerim û zêde girîngî didim serbixwebûnê. Ji ber ku zêdetir nîqaş dernekeve ez ji civînê derketim."

Li ser pirsa "Nêzîktêdayîna Serokwezîr a ji bo çareserkirina pirsgirêka kurd çi ye" Tanrikulu got; "Ez nizanim, Serokwezîr dê baştir binirxîne. Lê me got ku ev pirsgirêk ne tenê pirsgirêka aboriyê ye, aliyên wê yên siyasî hene, gere di vê çarçoveyê de bê nirxandin." Her wiha Tanrikulu da zanîn ku ger Serokwezîr bixwaze dikarin careke din hevdîtinê pêk bînin.

Li gor hin agahiyan jî li ser zimanê kurdî di navbera Serokwezîr Erdogan û Tanrikulu de nîqaş derketiye û ji ber ku Serokwezîr gotinên tûj bikaranîne Tanrikulu dev ji civînê berdaye û derketiye derve.

Li gor nûçeyeke din jî Tanrikulu wisa gotiye: "Dibe ku serokwezîr gotinên min nepejirîne. Ez ne mebûsê wî me. Serokwezîr nikare kesî bi nedirustbûnê şermezar bike. Ez dirustbûna xwe bi kesî nadim nîqaşkirin."
Her wiha Tanrikulu daye zanîn wî Almanya û Swêd mînak daye û di gotinên wî de tu pirsgirêk nîn in.

Serokwezîr Erdogan û Serokê Baroya Amedê Sezgin Tanrikulu di 5'ê rêbendana 2008'an de jî li serdana Serokwezîr a Amedê de nîqaş kiribûn. Di wê hevdîtinê de Tanrikulu xwestibû ku bi kurdî perwerdehî bê kirin û Erdogan dîsa hêrs bûbî.

Her wiha Heyeta ku ji saziyên sivîl ên Amedê pêk dihat îro bi Serokê Giştî yê DSP'ê Zekî Sezer re jî hevdîtineke pêk anîn. Her du aliyan dan zanîn ku hevdîtin baş derbas bûye. Heyet ku dê îro bi DTP'ê re hevdîtin pêk bianiya ji ber kêmbûna demê hevdîtina xwe hiştin ji bo sibê. Li bendê ne ku heyet dûre bi CHP û MHP'ê re jî hevdîtinê pêk bîne.