Bedirxan Mukriyanî

Dokumanteran li ser mitriban ku ji aliyê Dennis Dargul ve hatiye kişandin ji 53 deqîqeyî pêk tê.

Xebata fîlmê dokûmanter Koçûbar ku li ser hûstayên wate "qereçên" Kurdistanê ye ber bi dawî ve diçe. Ev xebata hanê ku ev serê salekê ye tê meşandin beşek ji projeya Enstîtuya Kelepûrê Kurdî ya Dihokê ya taybet bi hûstayên Kurdistanê ye. Derhêneriya dokûmanterê ku 53 deqîqe ye, ji aliyê Dennis Dargul û montaja wî jî ji aliyê Azad Rojbeyanî hatiye kirin.
 
Di vê dokumanterê da ku xebata wê ya meydanî li devera Badînan û Hewlêrê hatiye kirin, dîroka qereçan, rewişt û tîtal û huner û hunermendiya wan tê raberkirin. Bi gotineke berfirehtir lêkolîn li ser binyada wan hatiye kirin bê kengê û ji ku hatine; her wiha êl û hozên wan, sedema koçberiya wan, nasnameya wan a Kurdistanî û gerdûnî hatine diyarkirin.
 
Ev gelê revend, li başûrê Kurdistanê xwe wekî hûsta bi nav dike û li bakurê Kurdistanê jî bi navê mitrib, gewende, qereç û aşiq tê naskirin. Ew di jiyana hunerî û ferhengî ya kurdan de bi roleke girîng rabûne; bi taybetî di warê muzîkê de.