Diyarname

Pismamê Mam Celal ê bi navê Şêx Selah li ser merasima dê ji bo Mam Celal li dar bikeve axivî. Her wiha li Rojava 3 roj şîn ji bo Mam Celal hat ragihandin.

'Cenaze wê li Debaşan bê definkirin'

Pismamê Mam Celal Talebanî, Şêx Selah Talebanî bi daxuyaniyeke taybet eşkere kir ku wê cenazeyê Talebanî li Debaşan ku mala Talebanî lê ye were definkirin û niha amadekariyên cih tên kirin.”

Pismamê Mam Celal Talebanî, Şêx Selah Talebanî der barê dem û cihê merasîma definkirina Talebanî de ji bo Rojnewsê wiha got: “Li gorî min li Debaşan li cihê ku mala wî lê ye cihek jêre hatiye veqetandin û wê li wir were definkirin. Wê cenazeyê Talebanî destpêke bînin Bexda û û li wir wê merasîmeke were lidarxistin. Paşê wê cenaze bînin Silêmaniyê û defin bikin. Em niha amadekariyên merasîmê dikin.”

Definkirin wê roja înê be
Li gor gotina Berdevkê YNK'ê Sadî Ehmed Pîre cenaze ji Almanyayê dê bînin Bexda, li wir piştî merasima fermî dê cenaze bibin Silêmanî. Şîn dê 7'ê mehê roja şemiyê bê danîn.

Li Rojava 3 roj şîn heye

Kordînasyona Giştî ya Rêveberiya Xweseriya Demokratîk ya Rojavayê Kurdistanê bi daxuyaniyeke nivîskî ji bo Mam Celal ji bo 3 rojan şîna neteweyî îlan kir û hate gotin ku gelê kurd bi wefata Mam Celal lîderekî kurd, kesayetek dîrokî û siyasî ji dest daye.

Daxuyaniya Kordînasyonê wiha berdewam dike: “Wekî Federasyona Demokratîk ya Rêveberiya Giştî Kantonên Rojavayê Kurdistanê sersaxî ji Hêroxan, Qubat Talabanî, dost û endamên YNK’ê, ji gelê kurd li Başûrê Kurdistan û gelên Iraqê û ji gelê kurd li Rojavayê Kurdistanê re dixwazin. Birêz Mam Celal, di demeke wisa de koçî dawî kir ku ji her demê zêdetir niha pêwîstiya gelê kurd ji bo yekîtiya neteweyî pê hebû. Ji bo partiya xwe xwedî hemû taybetmendiyên rêber û fermandarekî bû. Di demeke wisa krîtîk a Rojhilata Navîn ku niha bi taybet di tê de derbas dibe de, Mam Celal koça dawî kir. Ev lîderê kurd di pêwendiyên siyasî yên navbera Iraq û Kurdistanê yên li herêmê de xwedî roleke çalak bû. Kurd bi wefata Mam Celal lîderekî kurd, kesayetekî dîrokî û siyasî ji dest da. Em wekî Kordînasyona Giştî ya Rêveberiya Xweseriya Demokratîk a Rojavayê Kurdistanê bi boneya wefata Mam Celal 3 roj şîna fermî li Rojava radigihînin.”

Heyeta HDP, KCD û DBP diçe Başûr

Ji bo beşdariya merasima cenazeyê ji Bakur heyetek diçe Başûr. Di nav heyetê de dê Hevseroka HDP'ê Serpil Kemalbay, Berdevkê HDP'ê Osman Baydemir, hin mebûsên HDP'ê, Hevserokê DBP'ê Mehmet Arslan û Hevseroka KCD'ê Leyla Guven dê hebin.

**

Nûçeyên Eleqedar:

- Demîrtaş: Mirina Talabanî ji bo hemû mirovahî windabûnek mezin e 

- Turk: Gere em xelata Mam Celal bînin cih

- Mam Celal xatir xwest