Diyarname

Serokê Yekîtiya Niştimanî Kurdistanê Celal Talabanî ku li nav kurdan her kesî digot Mam Celal îro wefat kir.

Yek ji rêberên kurdan Celal Talabanî ku piştî hilweşîna Sedam Huseyîn di hilbijartinê de wekî Serokomarê Iraqê hat hilbijartin îro li Almanyayê wefat kir. Mam Celal ev demek bû li Almanyayê dihat dermankirin.

Celal Talabanî kî ye?

Mam Celal di 12.11.1933'yan de li Kelkanê hatiye dinê. Hê di ciwaniya xwe de di nav avakarên Yekîtiya Xwendekaren Kurdistanê de cih girt ku girêdayî PDK'ê bû. Ji wê rojê de di qadên cur bi cur de Mam Celal di nav têkoşînê de cih girt. Pêşmergetî kir, di bin banê PDK'ê de heta 1975'an de xebitî. Piştî wê demê di navbera wî û Mele Mistefa Barzanî de cudabûna fikran derket holê ligel komek ji PDK'ê veqetiya û di sala 1975'an de YNK ava kir.

Di dema komkujiya Sedam Huseyîn a bi çekên kîmyewî de derbasî aliyê Rojhilatê Kurdistanê bû. Paştê bi Şerê Kendavê ve vegeriya Başûr. Di sala 1992'yan de YNK û PDK'ê li hev kir û li Başûr her du bûn serdest lê 94'an di navbera herduyan de dîsa pevçûnan dest pê kir. Heta 96'an ev yek dom kir. Amerîka û Îngilistan ketin navberê û 96'an de her duyan şerawestin ragihand. Heta salên 2000'î wisa dom kir. Dema 2003'yan de hêzên Dewletên Yekbûyî yên Amerîkayê ketin Iraqê û Sedan Huseyîn daxistin xweseriya li Başûr xurtir bû. Wê çaxê li Iraqê hilbijartinên giştî çêbûn û Talabanî li ser navê kurdan wekî Serokomarê Iraqê hat hilbijartin (22.04.2003). Ew bû yekemîn kurd ku dibe Serokomarê Iraqê. Heta 2014'an ev peywira wî dom kir.

Mam Celal di 18'ê berfanbara 2012'yan de felc bû û ji bo dermankirinê çû Almanyayê; piştî 18 mehan vegeriya Başûr.

Mam Celal Talabanî ligel Hero Îbrahîm Ehmed zewivî bû û du heb zarokên wan hene. Mam Celal ligel kurdî (soranî û kurmancî) bi farisî, erebî û îngilîzî dizanî.

Talabanî 11'ê meha borî ji bo dermankirinê çûbû Almanyayê û îro li wê derê wefat kir.