Diyarname

Piştî referandûmê ji her alî daxuyanî, kirin û helwest tên. Me ji îro çend ji wan ên girîng da 

Komîsyana Hilbijartinê encam eşkere kir

Komisyona Bilind a Hilbijartinê encama dawî ya referandûma Herêma Kurdistanê ku 25’ê rezberê li dar ketibû eşkere kir. Li gor komîsyonê ji 4 mîlyon û 581 hezar hilbijêran 3 mîlyon û 305 hezar û 92 kesî deng dane ku ev yek dike sedî 70’ê çûne cem sindoqê û deng dane. Ji van sedî 92 dengê "erê" dane û sedî 7,27" dengê "na" dane. Ji dengdan 21 hezar û 180 deng hatine betalkirin.

Tevgera Ji Niha Re Nexêr îdîa anîn ziman

Piştî referandûmê Berdevkê Tevgera ji Niha re Nexêr Rabûr Mehrûf li Silêmanî daxuyanî da û got: “Ew encamên ku komîsyonê ragihandine, nerast in. Li wan encaman destkarî hatiye kirin. Bi hîleya saetek dirêjkirina dema dengdanê hatine kirin. Rêjeya tevlîbûna hilbijartinê ji sedî 48 û rêjeya erê jî sedî 25 zêdetir nebû. Li Dihokê 722 hezar kesî mafê dengdanê hebû, lê belê zêdetirê 900 hezar kesî deng bikar aniye. Hemû ev hîle ne bûne sedema ku referandûm bibe henekpêkirin. Ji bo wê em daxwaz ji hikûmeta Iraqê û welatên cîran dikin ku ji ber helwesta kêmîneyekê, xelkê Herêma Kurdistanê ceza nekin.”

Sedî Pîre: Em amade ne guftûgoyan li gel welatên cîran bikin 

Berdevkê Polîtburoya YNK'ê Sedî Ehmed Pîre axivî: "Niha 2 roj in li ser referandûmê re derbas dibe. Gelek axaftin tên kirin û dibêjin wê deriyên sînor werin girtin. Lê ev yek propaganda ye. Em amade ne ligel welatên cîran guftûgoyan bikin. Ji ber ku ev pêngava me pêk anî, projeyek mezin e. Gelek axaftinan di nava xwe de digire. Nabe em guh bidin her axaftinên li ser referandûmê tên kirin. Hinek ji axaftinên tên kirin pêwendî bi hilbijartinên Iraqê yên bên ve heye. Ew kesên ku dixwazin li dijî kurdan daxuyaniyên tund bidin, ji bo bikarin ji bo xwe xelkê kom bikine."

Herêma Kurdistanê daxwaza Ebadî red kir 

Serokwezîrê Iraqê Heyder Ebadî gotibû ku divê di nava sê rojan de balafirgehên li Başûr radestî hikumeta Iraqê ya navendî bikin. Îro jî bi daxuyaniyeke fermî ji şîrketên balafiran xwest ku seferên ji bo Başûrê Kurdistanê bidin sekinandin. 

Wezîrê Veguhestin û Gihandinê yê Herêma Kurdistanê Mewlûd Bawemûrad  axivî û got: "Ji bo danîna mekanîzmeyek pêwîst em ji bo guftûgoyên ligel Iragê amede ne, eger niyeta wan ya pêkanîna yasa hebe. Eger ji bo cezakirina referandûmê be, wê guftûgo negihin tu encamê."

Pegasûsê seferên ji bo Hewlêrê dan rawestandin

Li Tirkiyeyê Berpirsê Rêyên Hewayî yê Pegasusê Mehmet Nane ragihand ku wan seferên xwe yên ji bo Hewlêrê dane rawestandin. Nane ji bo Bloombergê axivî diyar kir ku wan li gor biryara Rêveberiya Navendî ya Iraqê ew tevgeriyane û ew li gor seferên navneteweyî tevdigerin.

Her wiha hat ragihandin ku THY (Rêyên Hewayî ya Tirk) û Atlas Global jî dê seferên xwe yên Hewlêr û Silêmanê piştî 29'ê mehê bidin rawestandin.

***

Hin nûçeyên eleqedar: 

- Ji serê sibê de agahiyên li ser referandûmê (Hemû agahyên roja 25'ê mehê)

- Meclisa Kerkûkê biryara dûrxistina Necmedîn Kerîm red kir 

- Komên Kurdî beşdariya Parlamena Iraqê rawestandin 

 - Waliyê Kerkûkê ji peywirê hat girtin