Agirî
7'emîn Mîhricana Çand Huner û Turîzmê ya Ehmedê Xanî bi konsera 70 hezar kes tev lêbû bi dawî bû.
Hevserokê DTP'ê Ahmet Turk di axaftina xwe de balkişnad ser nîqaşên têkildarî pirsgirêka kurd û wiha got: "Ev axaftinên der barê çareseriyê de erênî dibînin. Lazim e bêyî di nav demê de bên belav kirin, gav bên avêtin. Birêz Ocalan hemû derfetên xwe ji bo aştiyê bikar tîne. Ji bo vê lazim e hemû kesên hewla aştiyê didin muhatab bên girtin. Ku kurd muhatab neyên girtin, ev pirsgirêk çareser nabe. Gelê kurd 30 salan li dijî zilmê têkoşî ye."

7'emîn Mîhricana Çand Huner û Turîzmê ya Ehmedê Xanî bi konsera ku 70 hezar kes beşdar bûn bi dawî bû. Hevserokê DTP'ê Ahmet Turk, parlementerê serbixwe Ufuk Uras, parlementera DTP'ê Aysel Tugluk, Şaredarê Wanê Bekîr Kaya, Şaredara Bazîdê Canan Korkmaz, Şaredarê Îdirê M. Nurî Guneş û şaredarên DTP'ê yên navçey û bajarên derdorê zêdeyî 70 hezar kesî beşdarî konsera li Stadyuma Bajar pêk hat bûn.

Turk, bal kişand ser Orhan Dogan, got ku wan li Bazîdê hevalekî xwe winda kir û wiha dom kir: "Ehmedî Xanî û Orhan Dogan li qûntarê Çiyayê Agirî helbestên azadiyê xwendin û ji nava me bar kirin. Hevalê me Orhan Dogan jî wekî Ehmedê Xanî evîndarê azadî û felsefeyê bû. Em jî li hizûra wan dibêjin aştî azadî û biratî. Bi hêviya gelê kurd nasname, ziman û çanda xwe azad bijî. Ez hurmeta xwe ji Ehmetê Xanî û Orhan Dogan re pêşkêş dikim."
Piştî axaftina Turk, 70 hezarên beşdarî konserê bûbûn bi stranên Çar Newa û Koma Rewşen coşiyan. Mihrîcan bi daxwazên aştî û biratiyê bi dawî bû.