Diyarname

Wezîrê Pêşketinê yê Almanyayê Muller got ku Almanya amade ye 34 mîlyon Euro alîkariya Misûlê bike.

Neteweyên Yekbûyî (NY) û rêxistinên alîkariyê bi tirs in ku li Misûlê dê felaketek mirovê çê bibe. Ji niha de li ser rewşa kesên li Misûlê û tiştên dê biqewimin gotûbêj têne kirin.

Wezîrê Pêşketinê yê Almanyayê Gerd Muller ji bo rojnameya "Neuen Osnabrücker Zeitung" axiviye û gotiye ku Saziya Alîkariya Teknîkî ya Alman (THW) li Iraqê alîkariyê belav dike, ew amade ne alîkariyên fînansê ya zêdetir bidin vê saziyê. Muller gotiye dema pevçûn gur bibin texmîna wan ew e dê mîlyonek kes ji Misûlê birevin. Wezîrê alman bibîr xistiye ku niha li herêmê 8 mîlyon kes ji herêma xwe dûr cihên cuda dijîn.

Muller gotiye Almanya di warê bi cih bûn û tenduristiyê de alîkariya penaberan dike.

NY: DAIŞ sivîlan wekî mertal bikar tîne

Di vê navberê de Komîserê Bilind ê Mafên Mirovan ê Neteweyên Yekbûyî (NY) Zeyd Raad el Huseyîn roja înê li Cenevreyê axivîbû û gotibû ku DAIŞ li Misûlê sivîlan wekî mertalên zindî bikar tîne. Her wiha Huseyîn gotibû ku çeteyên DAIŞ'ê ji gundiyan re dibêjin gundê xwe terk bikin û herin navenda Misûlê.

Ji beşa tirkî ya Deutcshe Welle hatiye girtin