Amed
9'emîn Festîvala Çand û Hunerê ya Amedê bi coşeke mezin bi dawî bû. Vane notên ji şeva dawî ya Festîvalê:

- Festîvala ku ev 4 roj bûn li dar bû bi beşdariya konsereke ku li dor 10 hezar kesî beşdar bû bi dawî bû.

Festîval dê bi Meşa Aştiyê û konsera dawî ji bo saleke din xatir bixwesta, wisa jî bû. Girseyeke mezin ku li Park Ormanê kom bûbû ber bi qada konserê ya li Dîcle Kentê ve dest bi Meşa Aştiyê kir. Hevserokên DTP'ê Ahmet Turk û Emîna Ayna, Mebûsê ODP'ê Ufuk Uras, Seroka Giştî ya SDP'ê Fîlîz Koçalî, Şaredarê Bajarê Mezin ê Amedê Osman Baydemîr, şaredarên navçeyan, nûnerên rêxistinên civakî û bi hezaran kes beşdarî meşê bûn.

- Konsera bi stranên koroyên Êlih, Amed, Cizîr û Qoserê yên zarokên ên navendên girêdayî NÇM'ê dest pê kir.

- Hunermend Aramê Dîkran digel ku di bernameyê de nîn bû wekî surprîzek bû mêvanê şeva dawî ya festîvalê

- Ji hunermendên Akademiya Çand û Hunerê ya Kurd Hekîm Sefkan, Xemgîn Bîrhat, Peywan Arjîn, Zozan, Alî Asker bi stranên xwe şevek taybet pêşkêşî temaşevanan kir. Bi taybetî li Amedê hatina cem hev a endamên berê yên Koma Berxwedana navdar dengek, rengek, coşek cihê bû ji bo temaşevanan. Stranên nostaljîk ên salên 90'î vê carê li Amedê hatin gotin.

- Endamên Şahiya Stranan a hunermendên NÇM'ê Bulent Turan, Farqîn, Ayfer Duzdaş, Alî Geçîmlî, Genim, Çiya û Rojda di nav de cih digirin derketin ser dikê.

- Di şevê de Hevseroka DTP'ê Emine Ayna, Şaredarê Bajarê Mezin ê Amedê Osman Baydemîr, li ser navê Meclisa Aştiyê Murat Çelikkan axaftin kir.

- Ji Welatê Baskê koma Gose Baskê derket ser dikê, stranên xwe pêşkêş kir

- Îsal balkêşiyeke din a festîvalê bi awayekî zindî weşandina çalakiyên wê bû. Bi pergala ku hatibû sazkirin her weşana ku bixwest dikarî festîval bi awayekî zindî biweşîne. Ji televîzyonan Roj Tv, Hayat TV ji vê pergalê sûde wergirt û bername bi awayekî zindî weşand.
Dema Hevseroka DTP'ê Emîna Ayna ji bo axaftinê derket ser dikê, Midûriyeta Polîsan a Amedê bi hinceta "Konser di Roj TV'yê de zinî tê weşandin" weşana zindî asteng kir. Li ser vê yekê Şaredarê Bajarê Mezin ê Amedê Osman Baydemîr li rayedarên ÎHA'yê geriya û xwest ku li gorî peymana ji bo weşana zindî ya 3 rojan hatiye îmze kirin tevbigerin. Li ser vê yekê rayedarên ajansê weşan domandin.

***

Nûçeyên eleqedar:

- Hemû bernameya Festîvala Amedê

- Li Amedê cejna fîlman

- Deriyên Festîvala Amedê vedibin

- Festîvala Amedê bi vekirina pêşangehan vebû

- Gotin ê jinên dengbêj bû

- Dîcle: Bila Tirkiye bibe 20-25 parçe

-