Silêmanî

Navenda PEN’ê ya Navneteweyî ku navendek taybet a nivîskaran e û zêdetirê 140 welatên cîhanê xebat dimeşîne, li ser malpera xwe ya fermî têkildarî qetilkirina rojnameger û nûçegihanê ajansa Rojnewsê Wedat Hisên Elî daxuyaniyek nivîskî weşand.

Daxwaza ronîkirina qetilkirinê kir

Navenda PEN'ê bal kişand ser metirsiya jiyana nivîskar û rojnamegerên li Herêma Kurdistanê û wiha got: “Em ji desthilatên herêmê daxwaz dikin ku jiyana welatiyan biparêze. Bi taybetî jî jiyana rojnameger û nivîskarên Kurdistanê biparêze. Ji ber li her cihekî ku zext û terorkirina dijî rojnamegeran hebe, desthilata wê herêmê jê berpirs tê girtin. Bi vê boneyê daxwaz ji asayîşa Dihokê dikin, li ser doza rojnameger Wedat lêkolînek zû pêk bîne û kujeran radestê dadgehê bike.”

Revandin û kuştin

Rojnameger Wedat Hisên Elî di 13’ê gelawêjê de li Dihokê ji aliyê komek kesên nenas ve hat revandin û piştî çend saetan cenazeyê wî ku tiliyên wî hatin şikandin û gelek şopên îşkenceyê li ser bûn, hat dîtin. Li gel vê jî heya niha asayîş û rayedarên Dihokê têkildarî eşkerekirina kujerên Wedat tu xebatek nekirine.