Cemil Oguz

Di "Şiir İstanbul" de, li Dêra Kirimê digel helbestên dinyayê helbestên kurdî olan jî dan.

4'emîn Festîvala Helbestan a Navneteweyî ya Beyogluya Stenbolê "Şiir İstanbul" ji aliyê  Tarih ve Toplum Bilimleri Enstitusu Dernegi û Şaredariya Beyogluye ve tê organîzekirin.
Festîvala ku PEN'a Tirkiyeyê û Komeleya Wêjevanan jî piştgirî dide de îsal ji 31 welatan 42 helbestvan beşdar dibin. Digel helbestvanên ji Îngilistan, Kuba, Îran, Iraq, Sûrî, Lubnan, Tirkiye ve hê gelek welatên din, helbestvanên kurd jî beşdar dibin.
"Şiir İstanbul" ku ji her gelî her zimanî helbestvanan beşdar dike de, helbestvanên bi zimanên cihê tîne ba hev wan bi hev dide nasîn, helbestên wan digihîne hev û di heman demê de li cihên dîrokî yên Stenbolê de dîrok û helbestê tîne ba hev. Yek ji van cihan jî Kirim Kilisesî (Dêra Kirimê) bû ku duh çalakî li wê derê li dar ket.
Dêra Kirimê di sala 1858'an de di dema şerê Kirimê de dest bi çêkirina wê hatiye kirin. Mîmarê wê G.E. Street e û erseya dêrê ji aliyê Siltan Abdulmecid ve hatiye pêşkêş kirin. Çêkirina dêrê 10 salan didome û heta sala 1971'ê ew der ji bo îbadetê tê girtin. Piştî ku hejmara camaeta dêrê kêm dibe wê salê dêr tê girtin, di sala 1991'ê de careke din tê vekirin. Di van çend salên dawî de jî dêr digel îbadetê xizmetê çalakiyên çandî jî dike.
Û çalakiya "Helbestvanên Jin Digihên Hev" jî di êvara 22'yê mehê de li dêrê li dar ket. Di çalakiyê de helbestvan wekî Şarareh Karmanî (Îran), Maria Elena Balanco (Kuba), Fevziye El Mîr (Sûrî), Paula Meehan (Îrlanda), Olcay oztunali (Tirkiye), Oya Uysal (Tirkiye) û gelekên din helbestvanên kurd Fatma Savci û Gulîzer jî amade bûn.
Helbestvanên jin her yek bi zimanê xwe helbesteke xwendin, Fatma Savci û Gulîzerê jî bi zimanê xwe.
Savci berî dest bi xwendina xwe bike, gotina "Jinên DTP'yî ku tekane sûcê wan ew bû têkoşîna siyasî didan; demek berê di operasyona li hemberî wan de hatin binçavkirin û girtin. Ez vê operasyonê şermezar dikin û helbesta xwe diyarî wan dikim" anî ziman û dest bi xwendina helbesta xwa "Qedera Qurnefîlê" kir. Helbestvan Gulîzer hilbesta xwe "Porkurê" xwend.

"Şiir İstanbul" ku heta 26'ê mehê dê li dar bikeve de çalakiyên din ên ku dê balê bikişînin bi beşdariya dengbêj, nivîskar û helbestvanên kurd dê li dar bikevin hene.

Ji van çalakina roja 24'ê mehê saet 12.00'an de li Şanogeha Muammer Karacayê bi navê "Kurd, jin û helbestvan" çalakiyeke di bin rêveberiya helbestvan Jana Seyda de li dar bikeve. Di çalakiyê de helbestvanên kurd Gulîzer, Fatma Savci û Xelat Ahmed wê hem helbestên xwe bixwînin hem jî qala çîroka helbestên xwe bikin.

Heman rojê saet 18.30'yan de jî li Kumbara Sanat Merkeziyê di bin rêveberiya Xwediyê Weşanên Avestayê Abdullah Keskîn de dê çalakiya "Wêjeya Kurd a Modern" li dar bikeve. Di çalakiyê de nivîskar Abidin Parilti wê li ser wêjeya kurdî biaxive.

Çalakiye din ku di nav Şiir istanbulê de derdikeve pêş jî çalakiya "Kevneşopiya çîrokbêjî û dengbêjî" ye (26'ê mehê saet 13.00, Kumbara Sanat Merkezi). Ev çalakî dê ji aliyê Abidin Parilti ve bê bi rê ve birin û di çalakiyê de dengbêj Seyidxanê Boyaxçî wê hem klamên xwe bibêje û hem jî qala çîroka wan bike.

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.