Ulkem Zeremya

Serva ravey şiyayişê zaraveyê kurdî dimilkî omidê ma her roj hewna vêşêr pîl beno. Çapemeniya azad yê kurd bi rihê seferberî, weşanê bi dimilkî (kirmanckî) zêdnena. Nê gaman ra jû zî qenala televizyon ya bi dimilkî ya. JIYAN TV roja Newroz de bi slogana “Xo bê ziwan ziwanê xo zî bê kes meverdê” destpa weşana bi dimilkî kerd. 

Beno ke serva şaranê bîn, serva zaraveyanê kurdî no çî, çiyeke normal bo. La serva ziwanê ma û şarê ma yê dimil gamekê tarîxî ya û zaf bi erja ya. Çima? Çike zaraveyanê kurdî miyan de, zaraveya ke tewr vêşîr pey de menda û bi talokeyê çinbiyayiş ra rî bi rî ya dimilkî ya. Zaraveyê bînî yê kurdî bi saya çapemenî û sazgehanê ziwanî xêlê ravey şî. Serva nay bi serrano tekoşîn û bedelî yenê dayen. La çi heyf ke, zaraveyê dimilî pey de mend û roj bi roj gan anceno. No rewşî ra, tenya sazgehê kurdî mesûl niyê, ma pêrokînî sûcdarî yê. Yê ke ziwanê xo ra hona zî şerm kenê, yê ke bi qeçikanê (doman) xo ra bi ziwandê xo qisey nêkenê, yê ke serva perwerdeyê bi ziwandê xo vengê xo nêkenê berz, yê ke bin tesîrê polîtîkayanê asîmîlasyonî de yê ûsb. herkes mesûl û gunahkar o. 

La ez nika wazena eleqe bianca JIYAN TV ser. Tesîrê televîzyonî ser civakî de zaf girdêr o. Bi raya televîzyonî, kişta negatîf ya zî pozîtîf fikir û  vînayişê newî, ziwan û îdeolojî zî kewno zereyê keyeyan. Televîzyon rolekê zey mektebî kay keno. 

Tirkiye de taybetî badê derbeya 12ê Îlon televîzyonî kewtî her keyeyî. Bi nayî ra piya dejenerasyon û asîmîlasyonê civakî destpa kerd û heta roja ma ya ewro ame. Panzehîrê nay zî, bi ziwandê xo de perwerde diyayiş û  taqîpkerdişê medya ya xo yo. Nika serva ma kirmancan zî endî (hinî) no îmkan esto. Endî rojnameyanê ma de bi dimilkî xeberî viraziyenê. Herzewbîn xêlê qenalanê kurdî de bi zonê ma bername û xeberî estê. Kişta nînan de hinî jû qenala ma ya televîzyon esta. 

JIYAN TV roşniya çimê ma, tîja keyeyê ma ya. Bi JIYAN TV ra piya heqîqet û raştiyan, hinî bi ziwandê xo pêhesneme. Herzewbîn na qenal de bernameyê perwerdeyê derheqê ziwanê ma de zî estê. 

Dersim, Çewlig, Gimgim, Sêwereg ra bernameyî viraziyenê. Pêrokîn raveyşiyayişê eleqedarê kirmancan û welatê xo de şenime JIYAN TV ra taqîp bikeme. Hinî ma çi pawenê. Desinde frekansanê televîzyona xo ayar bikeme. 

Satelîtî: TURKSAT 

Frekans: 12423 

Polarizasyon: H–Yatay

Sembol: 30000

Fec: 3/4

JIYAN TV çim, goş û ziwanê ma yo. Ma qenala xo bê wayir meverdê. Şarê ma rê bi xêr bo, bimbarek bo. 

26.03.2016, Yeni Ozgur Politika