Cemil Oguz

Enstîtuya Kurdî ya Stenbolê Xelata Feqî Huseyîn Sagniç a Ziman îsal dide Ahmet Turk.

Enstîtuya Kurdî ya Stenbolê ev çend sal in ji bo bîranîna zimanzan Feqî Huseyîn Sagniç Xelata Ziman a Feqî Huseyîn Sagniç dide kesek ku li ser kurdî û ji bo nasnameya kurdî ked daye. Rêveberiya Enstîtuya Kurdî ya Stenbolê îsal biryar da ku vê xelatê bide Hevserokê DTP'ê Ahmet Turk.

Li ser xelatdayîna ji bo Ahmet Turk me bi Serokê Enstîtuyê Sami Tan re xeber da. Tan li ser xelatdayîna ji bo Turk bal kişand ser aktuelbûna kurdîaxaftina Turk a di meclisê de, ev yek wekî gaveke gelek girîng bi nav kir û got: "Ahmet Turk bi axaftina xwe ya di meclisê de helwesta politikayên red û înkarê li ber çavan raxistiye. Tişteke din jî di bin banê cihê fermî de zimanê kurdî axiviye."
Her wiha Tan got "Wekî şexsiyet jî Turk ji bo ziman û nasnameya kurdî têkoşînê dide, heta niha ked daye. Ji ber van yekan me ew ji bo xelata Apê Feqî guncav dît."
Enstîtuya Kurdî ya Stenbolê her sal xelatê dide û di heman demê de Feqî Huseyîn Sagniç bibîr tîne. Li gor gotina Tan îsal merasima xelatdayîn û bîranîna Feqî Huseyîn Sagniç dê di 18'ê avrêlê de di salvegera Enstîtuya Kurdî de bê li dar xistin.

Enstîtuya Kurdî ya Stenbolê heta niha Xelata Feqî Huseyîn Sagniç a Ziman daye Zana Farqînî, Malmîsanij û Abdullah Demîrbaş. Îsal jî ev xelat gihîje ber destê Ahmet Turk.

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.