ELEZÎZ
Hevserokê DTP'ê Ahmet Turk, di gera xwe ya Elezîzê de diyar kir ku ew rastî 12'ê Rezberê, konsepta îmhaya 93-94'an hatine, lê belê êrîşan tu caran nekariye wan têk bibe û xewna wan a aştiyê dê vegere rastiyê.

Heyeta DTP'ê bi beşdariya Hevserokê DTP'ê Ahmet Turk, parlementerên DTP'ê Sevahîr Bayindir, Bengî Yildiz, Aysel Tugluk û Namzetê Şaredariya Çewlîkê Firat Anlî, serê sibê ji Çewlîkê derbasî Bajaroka Saricana Elezîzê bû. Heyet di ketina Saricanê de ji aliyê konvoya ji 200 wesayitan pêk tê ve hate pêşwazîkirin. Piştî heyetê Namzetê Bajaroka Saricanê Îsa Gurbuz bi gel da nasîn derbasî Navçeya Depê bû. Konvoy bi pankarta, "Karwanê Azadiyê, hûn bixêr hatin diyarê Mazlûman" hate pêşwazîkirin. Di pêşwazîkirinê de nêzî 4 kezar kesên li Kolana Depê kombûyîn dirûşmeyên, "Jin jiyan azadî" û "Êrîş me têk nabin" berz kirin.

'Depê 5 sal winda kirin'

Di serî de Namzeta Depê Asiye Kolçak, diyar kir ku Dep 70 sal e xizmet nedîtiye û wiha got: "5 sal berê şaredarî bi lîstikan ji destê me girtin. Depê 5 salên din jî winda kir. Tehamula me ya 5 salên din nema ye. DTP dê xizmeta pêwîst bike êdî."
Hevserokê DTP'ê Ahmet Turk jî li vir axivî û bal kişand ser zordariya 12'ê Rezberê. Turk, wiha got: "Me zordariya 12'ê Rezberê dît. Em bi konsepta îmhaya salên 93-94'an re rû bi rû man. Lê belê van êrîşan em têk nebirin. Em hîn li qada nin. Xewnek me ya xweş heye. Biratiya di nava aştiyê de ye. Em dê vê xewna xwe ya xweş bi hev re mil bidin hev û di nava biratiyê de bijîn."

'Em ji bo azadiya her kesî têdikoşin'

Turk, destnîşan kir ku piştî DTP ket meclisê û şûn ve banga diyaloga aştî û demokrasiyê dike, lê belê li hemberî vê bangawaziyê rastî bersiva înkar û îmhayê tê. Turk wiha axivî: "Me got bi înkar û îmhayê pirsgirêka kurd çareser nabe. Lê belê li pêşiya azadiyan bend lêkirin. Em li gel vê benda li pêş azadiyê têkoşîna xwe ya ji bo azadiyê didomînin. Em ji bo azadiya kurd û tirkan têkoşîna xwe dewam dikin. Têkoşîna me ji bo hezkirin û rûmetdayîna hemû mirovahiyê ye. Ev 30 sal e hûn nikarin bi înkar û îmhayê vê dozê bê deng bihêlin û hûnê nikaribin."
Ahmet Turk, bal kişand ser ziyareta Cîgirê Seroke Giştî yê AKP'ê Necatî Çetinkaya û wiha got: "Çetînkaya got me 'kadroyên cerdevaniyê anî'. Şerme şerm. Ma hûn dixwazin gel bi hev bidin kuştin."

'Li zimanê xwe xwedî derkevin'

Turk, destnîşan kir ku Tirkiye dikeve pêvajok nû û axaftina xwe wiha dom kir: "Ev hilbijartin ne hilbijartina şaredariyan e. Çavê hemû welatê cîhanê li ser kurdan e. Ji bo gerîla, polîs û leşker nemirin divê em di nava şêwirmendiyek xurt de bin. Em gelê misliman in. Li gel vê yekê ên mislimantiyê ji xwe re dikin destik hene. Her roj li qadan li ser Seîdê Kurdî diaxivin. Wê demê çima gora Seîde Kurdî dernaxin holê. Di 29'ê Adarê de li nasname, ziman û çanda xwe xwedî derkevin."

Ji DÎHA'yê hatiye girtin