Diyarname

Nivîskar Dilawer Zeraq heta niha çîrok nivisîne, pirtûk wergerandine, ferhenga biwêjan amade kiriye, roman nivîsîne, kovargerî kiriye. Bi van piralîbûna wî em wî vê mehê dikin mêvanê Portreya Mehê.

Nivîskar Zeraq di sala 1965'an de li navçeya Farqîna Amedê hatiye dinê. Wî ji dibistana seretayî heta lîseyê xwendina xwe li Farqînê temam kiriye û di sala 1985'an de Zanîngeha Dîcleyê Beşa Matematîkê qedandiye. 

Zeraq yek ji wan kesan e ku di salên 90'î de dest bi nivîsa kurdî kiriye. Wî di kovarên wekî Jiyana Rewşen, Rewşen Name, Kulîlka Ciwan, Kovara W, Tîroj û rojanmeya Welatê Me û Azadiya Welat de nivîsiye. 

Di nav tevger û civînên nivîskarên kurd ê di destpêka salên 2000'î de wî jî cih girtiye. Dema di sala 2004'an de kovara W wekî însiyatîfeke sivîl dest bi weşanê dike, ew jî yek ji wan kesên avakarê vê kovarê bû û her wiha wî heta hejmara 13'yan jî edîtoriya vê kovarê kiriye.

Zeraq ku demekê dersa zimanê kurdî jî daye, zêdetir bi çîroknivîsiya xwe tê nasîn. Zeraq ku bi çîrokên xwe di nav wêjeya kurdî de cih girtiye, paşê berê xwe daye romanê jî. Yek ji xebatên wî yên girîng jî "Deyimler Sozlugu - Ferhenga Biwêjan" a bi tirkî-kurdî ku ji Enstîtuya Kurdî ya Stenbolê derketibû ye.

Zeraq demekê endamtiya Lijneya Rêveberiyê ya Komeleya Nivîskarên Kurdî kiriye. Zeraq li Amedê dijî.

Berhemên wî:

- Kakil-kurteçîrok: Weşanên Sî, 2002, Stenbol

- Bişirîna Şermînî-kurteçîrok: Weşanên Aram, 2003, Stenbol

- Şevên Winda Wêneyên Meçhûl-Roman: Weşanên Lîs, 2005, Amed

- Ferhenga Biwêjan, Tirkî-Kurdî: Weşanên Enstîtuya Kurdî ya Stenbolê, 2005,

- Çilkên Pênûsê, kurteçîrok, Weşanên Lîs, 2009, Amed

- Mirina Bêsî - Roman, Weşanên Lîs, 2011, Amed

- Nexşên Li Giyan, Roman, Weşanxaneya Lîs, 2014, Amed

- Ferhenga Termên Matematîkê, Ferheng, (Amadekar: Dilawer Zeraq, Mem Wend), Weşanên Lîs, 2015, Amed

Wergerên wî:

- Ejdehayê Sêserî- (Leyla Erbîl): Weşanên Lîs, 2007, Amed

- Jiyanê Li Îstasyonê Dest Pê Kir- (Jaklin Çelik): Weşanên Lîs, 2007, Amed

- Mirina Li Madrîdê- (Oya Baydar): Weşanên Lîs, 2007, Amed

- Gelaciyên Bajarê Nû- (Müge İplikçi): Weşanên Lîs, 2007, Amed

- Hêrsê (Jaklin Çelik), Weşanên Lîs, 2012

- Kawayê Min–Benim Kawa’m (Amadekar: Bulent Ulus), Werger: Dilawer Zeraq – Davut Ozalp , Weşanên Evrensel, 2012, Stenbol

Foto: Mehmet Masum Suer 

Têbiniya Diyarnameyê: Nivîskarên kurd kedek gelek mezin didin, lê bi qasî keda ku didin qîmetê nabînin. Û bi taybetî piştî dimirin qîmetê dibînin. Me got belkî em vê yekê bikaribin piçek be jî biguherînin. Ji niha û pê de emê her mehê cih bidin nivîskarek kurd ku dijî. Ji bo vê yekê her serê mehê dê portreyek nû bê pêşkêş kirin. Em bi portreya nivîskarê hêja Dilawer Zeraq dest pê dikin.