Emîne Çelebî

Xortekî kurd. Ciwan û hêja. Di heman demê de zîrek û lihevhatî. Ma ne neviyê bedirxaniyan e? Ji dilê Cizîra Botan derketiye. Ew bi xeyalên xwe yên zarokiyê dijî. Kêm kes mîna wî xeyalên xwe yên zarokiyê bi cih tînin. Li alîkî ji bo gelê xwe yê bindest bijîşkî xwendiye û li cihê ku lê mezin bûye bijîşkî dike. Li aliyê din, kul, êş û keserên gelê xwe, bi muzîka xwe ya xweser, bi zimanê hunerê der dike. Ew dengê dilê evîndaran geş dike.
Dema ku me hev nas kir, di heman demê de xwîna min lê keliya. Lewre xortekî kurdewar û welatparêz… Di dema me de kêm kes mîna wî mane.
Ez behsa hunermendekî kurd dikim. Diljen Ronî, berî niha bi çend mehan albuma xwe ya yekemîn bi navê “Çend gotinên evînê”, ji Anadolu Muzîk pêşkeşî muzîkhezan kir. Min navê wî, bi awakî tesadûfî bihîstibû. Min jê roportajek xwest, dilê min neşikand. Albuma xwe diyarî min kir. Dema ku min li album guhdarî kir, ez sermest bûm. Lewre kêm kes albuma xwe ya yekemîn bi awayê profesyonelî derdixe. Hem bêhna dîrokên kevnare jê tê, hem jî caza hemdem a cîhanê. Dengê klarnet û neyê di vê albûmê de mirovan ber bi dîrokên dûr ve dikişîne. Dengê çello û keman, bi navê bêrîvanan re dibin yek û çiqas lihev tên... Di albumê de evîn bi tameke dîtir, dilê mirovan diperpitîne.
Dengên amûrên muzîka hemdem û yên gelerî ya rojhilat, di “Çend Gotinên Evînê” de bi hev re hatine hûnandin. Çello bi ney û tenbûrê re ketiye govendê. Di navberê de dengekî sivik ji nav dîroka her du çiyayên mezin Cûdî û Gebarê dertê. Hin kesên kurd ku di vî serdemî de ne gundî maye, ne jî bûye bajarvanî, dê di vê albumê de laqayî rastiya xwe bibe. Dê li alîkî axînek ji bo dîroka xwe bide û li aliyê din, ji bo ku jiyana hemdem nas kirine şad bibe.

Gulek
Dixwazim gulkê bidim te
Hêlm û bêhna wê bê te
Reng û pelên wê cuda
Ji hemû gulan

Evîndar gul û kûlîlkan
Jê dikin ji bo hezkiriyên xwe
Ji min re çi ku nikaribim
Vexwim ji şeraba lêvên te
 
Hunermend di albûma xwe de cih daye 6 stranên aîdî xwe. Strana destpêkê “Gulek” ku stranek slow e, bi peyv û muzîka xwe, diyar e, dê di nava klasîkên kurd de cihê xwe bigire. Strana bi navê “Newaya dil” bêrîvanên ku di serdema me de kêm mane, bi dengê klarnetê re bibîr tîne.
Hunermend di vê albûmê de cih daye stranên Miradê Kinê û Hişyarê Botî ku rengê muzîkên van navdaran, ahengeke dîtir daye albumê.
Albuma caz, rock û gelerî dê di dilê hunerhezan de bibe xwedî ciheke taybet.
Saeta te xweş birakê Diljen. Hêvîdar im dengê dilê te yê tenik, tu caran ji guhê kurdên muzîkhez kêm nebe.
 

eminecelebi21@hotmail.com

***

Nivîsên Emîne Çelebî yên ku berê di Diyarnameyê de hatine weşandin:

- Tu dema mirina keçên kivrîtfiroş de hatî
- Li ser şîroveyên hemberî Hegel çend bersivên girîng