Diyarname
Ev du roj in rojeva kurdan Gimgim e. Û îro dengê çekan bilind bû. Vane notên ji Gimgimê:
- Du roj berê gelê Gimgimê ragihand ku ew dixwazin xwe bi xwe bi rê ve bibin. Paşê hêzên HGP'ê ketin Gimgimê û ketina kuçeyan qedexe kir. Pêre rayedarên Dewletê jî derketina kolanan qedexe kir.
- Dewletê ragihand ku derketina kuçeyan vê sibê radikin.
- Îro dengên çekan, dengê teqînê hat.
- Heta niha tiştê dixuye li navçeyê gelek karhet hatine gulebarankirin, hin bi temamî şewitîne. Gel dibêje erebeyên zirxî yên dewletê kargeh dane ber guleyan.
- Ligel kargehan du xanî jî dane ber guleyan. Kesek bi navê Ahmet Memiş ku mala wî jî hatiye gulebarankirin ji bo DÎHA'yê wisa got: "Saet dor 3'yê serê sibê ez û zarokên xwe em li mal bûn. Panzêr li vir bû û mal da ber guleyan. Dema gule bera mal dan agir bi xanî ket. Ez ligel jin û zarokên xwe em derketin derve. Em ji mirinê filitîn."
- Abdulselam Bingol jî wisa dibêje "Du roj in pevçûn didomin. Kargel hemû dan ber guleyan. Zerarek mezin heye, mirin hene. xWedî zerar çêneba, mirin çêneba. Navçe bi temamî xira bûye."
- Kes tam nizane çend kes hatine kuştin. Qala 2 kesan jî, qala 5 kesan jî tê kirin. Lê nayê zanîn ku ev kes sivîl in, yan HGP'yî ne.
- Heyek ku di nav de mebûsên HDP'ê jî hebûn duh çûn Gimgimê lê hêzên ewlekariya dewletê nehişt ew bikevin navçeyê. Heyeta ku tê de Hevseroka KCD'ê û mebûsa Culemêrgê Selma Irmak jî hebû encax îro karîn bikevin navçeyê. Piştî çavdêrina bi beşdariya Irmak, mebûsên HDP'ê Ahmet Yildirim, Burcu Çelik, Hevşaredarê Agirî Sirri Sakik, Hevşaredarên Gimgimê Sabite Kaya û Huseyîn Guneş daxuyanî hate dayîn.
Irmak wisa got: "Li vê derê qiyamet rabû lê dewlet bêdeng e, dixwaze ser bûyerê binixumîne û miriyan jî direvîne."
Û hin gotinên Irmak:
- Li ser rêya Xinisê gotin parçeyên cenazeyên însanan hene, em bi wir ve çûn, medît yek yan hinek zêdetir parçeyên laşên mirovan hebûn. Parçe wisa belav bûne ku şopa hinan bi daran ve, hin li der û dorê bûn. Ligel vê yekê jî rayedar agahiyan nadin; pevçûn çêbû, ger çêbû encam çi bû? Me nekarî hîn bibin.
- Li navenda bajêr kargehek tenê jî sax nemaye, li her derê şopên guleyan hene. Xaniyek ligel ku mirov têde bûn xwestine bişewitînin.
- Gotin li Dortyolê pevçûn çêbûye lê me nekarî encamek bi dest bixin
- Dewletê li vir çi kiriye em tam nizanin. Qeymeqam ji navçeyê çûye, midûrê emniyetê tiştek nabêje., walî xwe daye alî.
- Di dema qedexeya derketina derve de rayedarên dewletê çi kirin, çend kes hatin kuştin? Ev mirov li ku ne? Ev şopên mejî,por û hestiyan aîdê kî ne? Bombe bi ser mirovan de barandi ne? Mafê raya giştî ye ku vê yekê hîn bibe.
- Emê hemû hewldanan bikin. Gelê Gimgimê ne bi tenê ye. Gelê Kurdistanê ligel Gimgimê ye. Em bang li gelê Kurdistanê dikin bila hev bi tenê nehêlin. Em bêdeng bisekinin dê komkujî bidomin.
Heyeta KCD û HDP'ê lêkolîna xwe ya li Gimgimê didomîne.
Foto: Refik Tekîn û DÎHA