Diyarname
Hejmara nû ya kovara Tîrojê derket. Tîrojê meseleya “Qeyran û neteweperestî” girtiye dest.

Kovara çandî, hunerî û wêjeyî Tîroj bi hejmara xwe ya 36’an a rêbendan-reşemiyê derket. Di kovarê de vê carê li ser “Qeyran û neteweperestî” dosya hatiye amadekirin.
Qeyrana aborî dinya girtiye bin destê xwe, Tirkiye jî di bin vê bandorê de ye. Qeyran neteweperestiyê xurt dike, di heman demê de fersendan jî derdixe holê. Kovarê jî ev mesele girtiye dest û li ser sekiniye ka dikarin çi ji vê qeyranê bê derxistin.
Di dosyayê de Ayhan Bilgen, Haluk Gerger, Ahmet Yaşaroğlu, Aziz Konukman, Osman Ergin, Ragip Zarakolu li ser mijarê nivîs nivîsîne.
Di nivîsan de nivîskar Haluk Gerder dibêje, “Li bajarên kurdan têkbirina AKP’ê berî her tiştî dê rewşa psîkolojîk a civakê bi awayekî xurt biguherîne. Ya diduyan jî divê kedkarên kurd li ser pirsgirêka kurd bêne perwerdekirin.”
Ayhan Bîlgen jî daye zanîn ku li Tirkiyeyê têkoşîna li hemberî xizaniyê bi çareserkirina pirsgirêka kurd re derbas dibe

Ji bilî dosyayê nivîs, çîrok, helbest, nirxandin û hevpeyvîn hatine pêşkêş kirin. Fehîm Işik li ser TRT Kurdî nivîseke pêşkêş kiriye, Mehmet Bayrak jî meleya aborî û çareseriya bi leşkerî raxistiye ber çavan.
Di kovarê de bi mebûsê DTP’ê yê Sêrtê Osman Ozçelîk re hevpeyvîneke kirine. Ozçelîk dibêje, “Zimanê me nasnameya me, hebûna me ye û em dev jê bernadin” û van lê zêde dike: “Perwerdehiya bi zimanê zikmakî kevira werçerxê ya aştiya civakî ye. Em di bikaranîna kurdî de israra xwe didomînin. Her wiha di meclisê de em car bi caran kurdî bikar tînin. Ev mafê me yê bingehîn e.”

Her wiha Cîhan Roj, Ferît Edgu, Kak Zêwer, Lokman Polat, Receb Dildar, Ronî War, Behlûl Zelal, Wezîrê Eşo, Kevser Ruhi, Tevfik Taş, Cuma Boynukara, Ali Konar, Nevzat Onaran, Sefer Güvenç, GulnurElçik bi nivîsên xwe di kovarê de cih girtiye.

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.