Enqere
Broşurên Projeya Xweseriya Demokratîk ku bi kurdî, îngilîzî û tirKî hatine amadekirin ji mebûs û wezîran re hatin şandin.

Di Kongreya Civaka Demokratîk de ya ku 24'ê kewçêra 2007'an de li dar ket de "Projeya Xweseriya Demokratîk" hatibû pejirandin. Ev proje di 2'emîn Kongreya DTP'ê ya Asayî ya ku di 8'ê sermaweza 2007'an de li dar ket de wekî "Belgeya Helwesta Siyasî" hat qebûlkirin û bu fermî.
Proje daxwaz dike ku Tirkiyeyê li 20-25 herêman bê parvekirin, ew herêm her yek xwedî sembolên xwe bin.

Niha broşurên li ser Projeya Xweseriya Demokratîk bi kurdî, îngilîzî û tirkî hatin amadekirin. Projeya ji 64 rûpelan pêk tê di 23'yê kewçêrê de bi posteyê ji 500 parlementer û 24 wezîran re hate şandin.

Projeya li hemberî pirsa 'Kurd çi dixwazin?' hatibû amadekirin, ji bo rêvebirina Tirkiyeyê pergala bi herêmî pêşniyar dike. Li gorî projeyê daxwaza makezagonek nû tê kirin û tê xewstin ku bi riya reforman rêvebertiyên herêmî bêne xurtkirin. Her wiha di projeyê de tê xwestin ku Tirkiye bibe 20-25 herêm û ev herêm bikaribin reng û sembolên xwe bikar bînin. Li gorî projeyê ziman û ala Tirkiyeyê ya hevpar yek e lê herêm jî dikarin zimanê xwe bikar bînin û ala wan hebin.

Her wiha tê xwestin ku bajarên wekî Trabzon, Amed, Wan û Erzirom wekî metropolên herêmî bên îlankirin.