Diyarname
Civaknas Îsmaîl Beşîkçî ku jiyana xwe di nav xebata li ser kurdan de derbas kir niha gotarên wî ji bo kurdî hatin wergerandin.

Yek ji kesên ku kurd herî zêde qîmetê didinê civaknas Îsmaîl Beşîkçî ye. Beşîkçî di sala 1939'an de li Îstîlîpa Çorumê hatiye dinê. Ew sala 1962'yan de li Enqereya Fakulteya Zanistên Civakî dixwîne û dibe civaknas. Beşîktî di sala 1962'yan de li Zanîngeha Ataturk a li Erzeromê, di Beşa Fen-Edebiyatê de dest bi asîstaniya civaknasiyê dike û ji wê û pêdetir têkiliya wî û ya kurdan dest pê dike. Ji wê rojê de li ser 'Pirsgirêko Rojhilat' ku dûre ev têgeh vediguhere dibe "Pirsgirêk Kurd" gotaran dinivîse, gotarên wî di kovar û rojnameyan de têne weşandin. Dema derbeya 12'yê Adara 1971'ê pêk tê ew jî dikeve ber pêla derbeyê û dikeve girtîgehê; êdî pêvajoya wî ya girtîgehê dest pê dike. Wî tu demê dev ji rastiyê berneda, di girTîgehê de jî nivîsî. Her qala kurdan kir, qala pirsgirêka wan; tehlîl li ser pirsgirêkê çêkir, pêşniyazên xwe pêşkêşî kurdan kir. Helbet dozger û rêveberên Komara Tirkiyeyê ji vê yekê ne razî bûn û doz bi ser dozê de der barê wî de vekirin. Di encamê de wî 17 salên xwe di girtîgehê de derbas kir lê qet ji ya xwe nehat xwarê, her dem rastî anî ziman.
Kurdan bi tirkî pirtûkên Beşîkçî xwendin heta çend salan berê. Çend sal berê pirtûkek wî ya li ser rewşenbîrî bi kurdî ji Weşanên Belgeyê derket û niha jî gotarên wî ji bo kurdî hatin wergerandin û wekî pirtûk hatin çapkirin.
Pirtûka ku bi navê “Ziman - Nasname – Netewe û Neteweperwerî” ji aliyê Weşanên Pêrî ve hatiye weşandin ji aliyê Roşan Lezgîn ve hatiye wergerandin.
Di pirtûkê de mijarên wekî Nasname, Nasnameya kurdî, Têgihîştina neteweperweriyê, Ziman netewe û rewşenbîr, Pirsa sereke di pirsa kurd de, Asîmîlasyon, Li ser têgeha 'ez kurd im lê ne kurdperwer im', Azadiya ramanê, Cihêrengiya me dewlemendiyên me ne, Gotinên Hallaçoglu, Tiştên ku Kosovaya serbixwe tîne bîra mirov, Pirsa kurd û AKP, Barzanî-Talabanî û gelek mijarên din hatine pêşkêşkirin.

Ziman - Nasname – Netewe û Neteweperwerî/ Îsmaîl Beşîkçî / Gotar / Werger Roşan Lezgîn / Weşanên Pêrî

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.