Amed

Nûnerên Komeleya Nivîskarên Kurd, Sendîkaya Nivîskarên Tirkiyeyê û Hunermendên Kibrisê û endamên Yekitiya Nivîskaran di çarçoveya Hevdîtina Nivîskaran a Bo Aştiyê de çûn serdana Hevşaredarên Bajarê Mezin a Amedê Gultan Kişanak û Firat Anli.

Di çarçoveya Hevdîtina Nivîskaran a Bo Aştiyê de Hevserokê Komeleya Nivîskarên Kurd Mehmet Yilmaz, ji Sendîkaya Nivîskarên Tirkiyeyê Suna Aras, Hakki Zarîç, Tahîr Şîlkan, Mustafa Kos, Aba Muslîm Çelîk û ji Yekîtiya Nivîskar û Hunermendên Kibrisê Neşe Yaşin, Hrîsantu Panîkos di şandeya nivîskaran de amade bûn. Ligel hevşaredaran Serokê Daîreya Çand û Turîzmê Muharrem Cebe, endamêm meclisê Kerem Canpolat û Kasim Bîrtek jî amade bûn.  

Anli bi gotina, “Em bi pêşwazîkirina rewşenbîrên xwe gelekî kêfxweş in” dest bi axaftinê kir û xweşhaliya xwe bi serdana nivîskaran anî ziman. Anli bal kişand ser girîngiya pêkvejiyana çand û nasnameyan û got, “Çand û nasnameyên cuda ji hev sûdê werdigirin û wisa berdewamê didin hebûna xwe” û Anli diyar kir ku ev erdnîgarî di vî warî de gelekî dewlemend e. Anli bi bîr xist ku li vî bajarî şopa 33 belkî jî hêj zêdetir şaristaniyan heye û wiha domand, “Li aliyekî rik û kîneke mezin li dijî pêkvejiyanê heye, li aliyê din jî li dijî vê rikê berfînên ku dixwazin vê jiyana bi hev re têkûz bikin hene.” Anli, da zanîn ku wan tu carî baweriya xwe bi wê neşikandiye ku piştî çelê berfîn şîn tên û got, “Hûn rûspiyên vê civakê ne, hebûna mirovên rewşenbîr hêviya me geştir dike. Em bi pêşwazîkirina we gelekî kêfxweş in. Hûn ser çavan hatine.”  

Kişanak jî kêfxweşiya xwe bi vê serdana nivîskaran derbirî û got, “Em gelek caran jiyanê tengav dikin. Hema her kes bi paceya xwe lê dinêre, bi karê xwe mijûl dibe û ji reh û bişînên civakî biş dûr dikeve. Hûn karekî ji her kesê cudatir dikin. Hûn jiyanê xwedî dikin, wê di nivîs, helbest û pirtûkên xwe de dineqişînin. Ez spasiya we tevan dikim.” Kişanak daxuyand ku ev hevdîtin ji bo wan jî gelekî girîng e û kêfxweşiya xwe bi hatina wan a Amedê anî ziman.

Li ser navê Sendîkaya Nivîskarên Tirkiyeyê Mustafa Kos axivî û mebesta serdana xwe derbirî. Kos, bal kişand ku ji mûj ve ye wan dil heye bêne Amedê û diyar kir ku piştî wan têkilî bi Komeleya Nivîskarên Kurd re çêkir, wan bi rewşenbîrên Kibrisê re li hev kir û berê xwe dane vê derê. Kos, bi bîr xist ku ew ji bo çûna Roboskî hatine vê derê û behsa mebesta xwe kir.

Piştre serdana li Şaredariyê, nivîsk çûn serdana Kampa Şengalê ya li Amedê.