QAMIŞLO
Alîkariya yekemîn ku li bakur û Tirkiyeyê ji aliyê 770 saziyên sivîl ên civakî û 20 partî û rêxistinên siyasî ve ji bo rojavayê Kurdistanê hatiye berhevkirin, bi kamyonan îro gihîşt bajarê Qamişloyê.

Ev sazî di bin navê Platfroma Piştgiriya Gelên Suriyê de hatibûn ba hev û dest bi berhevkirina alîkariyê kiribûn. Îro ev alîkarî 7 wesaîtan derbasî Qamişloyê kirin. Di nava alîkariya ku ji 70 tonan pêk dihat de ji ard, heta şîrê zarokan, derman, madeyên xwarinê û hwd. hebûn.

Ji bo derbaskirina alîkariyê li ser navê Platforma Piştgiriya Gelên Suriyê Parlamentera BDP’ê ya Amedê Emîne Ayna, Serokê Giştî yê Komeleya Mafên Mirovan (ÎHD) Ozturk Turkdogan, Endamê Meclisa Daîmî ya Kongreya Civaka Demokratîk (KCD) û Berdevkê Platforma Piştgriya Gelên Suriyê Seydî Firat, Şaredara Nisêbînê Ayşe Gokhan, Seroka Giştî ya Federasyona Komeleyên Malbatên Girtî û Hikumxwaran (TUHAD-FED) Zubeyde Teker, Serokê ÎHD’ya Amedê Racî Bîlîcî, nûnerên saziyên civakî yên sivîl jî hatin deriyê sînor. Ji bajarê Qamişlo jî Seroka Meclisa Bajêr Remziye Mihemed, rêveberên saziyên civakî yên sivîl û gelek kesên din jî amade bûn.

Di dema derbasbûna  alîkariyê de, çapemeniya herêmî û ya bakur û Tirkiyê jî eleqeyek mezin nîşan da.

Piştî muameleyên fermîn hatin çêkirin, qamyonên ku li pêşiya wan bi zimanê kurdî û tirkî pankarta, “Ji bo vîna gelan rêzdarî, ji ambargoyê re na” hatibû daliqandin derbasî aliyê din ê sînor bûn. Qamyonên ku yek bi yek derbas bûn li aliyê Qamişlo hatin valakirin û li qamyonên din hatin barkirin. Piştre jî ji aliyê komîteya alîkariyê ya girêdayî Desteya Bilind a Kurd ve teslîm hatin girtin.

‘ALÎKARÎ WÊ BIDOMIN’

Di dema derbaskirina alîkariyê de, li ser navê Platforma Piştgiriya Gelên Suriyê Zubeyde Teker, Ayşe Gokhan, Racî Bîlîcî û Abdulganî Bîlge bi kurdî û tirkî axivîn. Di axaftinan de hate destnîşankirin ku ji bo alîkarî bigihîje rojavayê Kurdistanê gelek hewldan hatine nîşandan û di encama van hewldanan de jî deriyê sînor ji bo derbasbûna alîkariyê hatiye vekirin.
Her wiha hate gotin ku ev alîkariya tê derbaskirin wekî destpêkê ye û dê berdewama wê jî bê. Di axaftinan de hate diyarkirin ku partî û saziyên bakurê Kurdistanê piştgiriya şoreşa Rojava dikin û heta dawiyê jî wê vê piştgiriya xwe bidomînin.

BI HEZARAN KES LI BER DERIYÊ SÎNOR KOM BÛN

Li aliyê din, dema alîkarî di deriyê sînor re derbas dibû, bi hezaran kesên ji Qamişlo jî li ber deriyê sînor ê Qamişlo kom bû û kêfxweşiya xwe anîn ziman. Girseya ku alên Desteya Bilind û TEV-DEM’ê, posterên Rêberê PKK'ê Abdullah Ocalan hildan, sloganên wekî, “Bijî yekîtiya gelê kurd”, “Bijî Serok Apo” qêriyan.

Wêne: ROZAN SERHAT/ANF

Nûçe ji ANF'ê hatiye girtin

***

Nûçeya eleqedar:

- Kamyonên alîkariyê derbasî Qamişloyê dibin