Cemil Oguz

16'emîn Rojên Belgefîlman a Stenbolê Documentarist dest pê kir. Heta 16'ê mehê dê bi sedan belgefîlmên ji Tirkiyeyê û ji qada cîhanê bêne nîşandayîn.

Ji bo destpêkirina Documentaristê li Metrohan a Tunela Beyogluyê ku girêdayî Şaredariya Bajarê Mezin a Stenbolê (İBB) ye merasimek hat li dar xistin. Belgefîlmkar Emel Çelebi û Necati Sonmez ku ev 16 sal in kordînatoriya Documentaristê dikin derketin ser dikê û der barê bernameyê de agahî da. Wan sipasiya ÎBB'ê kir ku ev cihê ku nû hatiye sazkirin û hê îro nû perdeya ji bo fîlman lê hatiye daliqandin ji bo wan terxan kiriye. Her du amadekaran sipasiya kesên piştgirî didin wan jî kir.

BELGEFÎLMÊN JI DINYAYÊ

Documentarist îsal bi diruşma "Meşa Belgefîlmên Helbestî" li dar dikeve. Ji dinyayê bi sedan belgefîlm hene. Ji dinyayê Documentaristê îsal berê xwe daye welatên Baltik. Ji Lîtvanya, Estonya û Letonyayê 13 belgefîlmên hatine hilbijartin di nav bernameyê de cih girtine. Derhênerê navdar ê ji Litvanyayê Audrius Stonys di vê çarçoveyê de dê derseke sînemayê jî pêşkêş bike. Di heman demê de bi navê  "Moteris ir Ledynas" (Jin û Cemed), "Skrydis per Lietuvą arba 510 Sekundžių Tylos" (Firîna bi ser Lîtvanyayê re yan jî Bêdengiya ku 510 saniye didome) û "Laiko Titai" dê belgefîlmên Stonys bêne nîşandayîn.

Ji Hollandayê du belgefîlmkarên jin û mêrên hev Petra Lataster-Czisch û Peter Lataster wekî mêvanên rûmetê têne Documentaristê. 3 belgefîlmên wan jî têne nîşandayîn: "Reis Door Onze Wereld" (Rêwîtiya Bo Dinyaya Me), "Jerome Jerome" û "Miss Kiet's Children" (Zarokên Kiet Xanimê).

Ji bilî van di Panoramaya Dinyayê de 3 belgefîlmên metrajdirêj hatine hilbijartin.

BELGEFÎLMÊN JI TIRKIYÊYÊ

Her sal beşa Panoramaya Tirkiyeyê bi dehan belgefîlmên ji Tirkiyeyê pêşkêş dike. Li gor gotina amadekaran ji nîvî zedetirên belgefîlmên îsal di bernameyê de ji Tirkiyeyê ne. Di beşa Panoramaya Tirkiyeyê de van belgefîlman cih girtiye: "Aşk, Ateş ve Anarşî Gunlerî: Turk Sinemateki ve Onat Kutlar", "Belgesele Yolculuk", "Ben, Annem ve Toz", "Bu Ben Degilim", "Cevizin Altinda", "Dinamo Mesken", "Duet", "Hatay: 17-24 Nisan 2023", "Hatice", "Başka Bir Dunya Yok", "Însanoglu", "Kavur", "Kim Mirhi", "Metamazon", "Rodakis'i Ararken", "Sandes", "Suriyeli Kozmonot", "Suyu Bulandiran Kiz", "Troas’ta Suya Dair", "Vakti Gelince", "Yuzler", "Zeytinligin Ardi".

Ji Tirkiyeyê derhêner Somnur Vardar wekî mêvana rûmetê hatiye hilbijartin. Di vê çarçoveyê de 3 belgefîlmên wê hatine hilbijartin. Belgefîlman wê "Boşlukta" îsal li Tirkiyeyê nav da. Di 42'yemîn Festîvala Fîlman a Navneteweyî ya Stenbolê de Xelata Belgefîlmê Herî Serketî girt. Dîsa ji Siyadê (Komeleya Nivîskarên Sinemayê) jî Xelata Belgefîlmê Salê girt. Ji bilî vê du belgefîlmên wê yên din "İstanbul Berlin'da" û "Yolun Başinda" têne nîşandayîn.

BELGEFÎLMÊN BI KURDÎ

Di nav belgefîlman de nêzî 10 belgefîlmên bi kurdî jî hene. "Dengê Radyoya Rewanê li ku ye?", "Rec", "Koçer, "Wergerandina Ulyssesê",

"Herkes Topraga Gomulur, Ben Suya", "Boşlukta" hin ji wan in. Di "Beşa Taybet" de bi navê "Ji bo aştiyê dengê jinan" de jî belgefîlmên li ser jinên kurd tê pêşkêş kirin.

HIN ÇALAKÎ

Ji bilî nîşandayîna belgefîlman Documentarist hin çalakiyan jî li dar dixe. Derhêner Audrius Stonys bi navê "Dîmenên Bêdengiyê" dersa sînemayê dê bide (Yekşem, 13.00, Metrohan). Dîsa bi navê "Kent, Emek, Afet" (Duşem, 19.00, Postane), "Di Belgefîlm de keda nayê dîtin" (Şemî, 14.00, Metrohan) û "Mavi Kuş Dayanişmasi" (duşem, 17.00, Metrohan) dê panel, forum û çalakiyên bi vî rengî li dar bikevin.

CIHÊN DOCUMENTARISTÊ

Îsal li aliyê Ewropayê li Beyogluyê cihên wekî Aynali Geçit (Li hember Lîsteya Galasarayê ye), Navenda Çanda Fransiz (Li ser Îstîklalê li Taksîmê ye) û li Metrohan (Li Tunelê ye), li aliyê Anadolu li Kadikoy jî li Caddebostan Kultur Merkezi û li Muze Gazhaneyê belgefîlm têne nîşandayîn.

**

Nûçeyên Eleqedar:

- Fîlmên 'Ji bo aştiyê dengê jinan' têne nîşandayîn 

- Belgefîlmên kurdî têne nîşandayîn  

-Documentarist li benda belgefîlman e 

**

- Mail: diyarname@diyarname.com    

**

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.