Na, ne gotinên wî, ne serhildana wî, ne cihen ku têre derbas bûye, ne jî heybeta wî. Tenê şimikên Şêx Seîd. Ev gelek li xweşa min çû.
Wisa dest pê dikir:
"Dengê şimikên wî zora dengê cizmeyên her du serbazan dibir, pêlên Dîcleyê jî bi awazên şimikên wî re deng vedidan! Hate bîra wî ku ev şimik diyariya havîna çûyî ye! Mirîdekî wî yê şimikçî ji Elezîzê dabûyê!
Wê demê wî kir û nekir, mirîdê şimikçî buhayê şimikê negirt:
- Meazellah ez xulam! Çawa çê dibe ezbenî! Ez gorî te bim, xweziya ez bibim pêlav ji bo lingên te yên mubarek.
Şêx dilê mirûdê xwe yê dest li ser hev û stûxwar nehişt û destê xwe di ser serê wî re bir û got:
- Xwedê bike ez gavên xêre bi vê şimikê bavêjim.
Bi hezaran gav bi vê şimikê avêtin! Pê çû mizgeftan, tirbên ewliyeyan, şînên miriyan, irşada xelkên gundan, lihevkirina axa û serokeşîran. Civînên ji bo hiqûqa kurdan. Ew şimika şoreşekê jî bû." (Rûpel 18)
Belê, tenê şimikên Şêx Seîd. Ji min re wekî semboleke xweş hat.
Dema ev rûpel li ber xwendina min ket, dilê min lê ket, ez careke din lê vegeriyem û min careke din xwend, û careke din jî.
Şimikek çiqas girîng e di nav jiyana mirov de? Û şimika Şêx Seîd ku ew heta ber Sûrên Amedê anîbû, bi vê jî nemabû, ew heta ber sêdarê biribû, di dema hejîna laşê wî de, şimikên ku ji lingên wî pekiyabûn erdê...
Bêşik em bi rengê şimikên wî nizanin, rengê şimikê çi dibe bila bibe, paragraf bêyî diyarkirina vê pêşkêşî me dike ku şimikek baş bû, baş hatibû çêkirin û pê gelek roj, meh, cih û war li dû xwe hiştibû.
Û hatibû ketibû nav romana "3 gav û 3darek", li wir êdî bûbû malê xelkê, bûbû nîşaneya destpêka xeyala me ya li ser wê demê. Meyê şimik û cihên ku têre çûye bianiya ber çavên xwe wekî şerîda fîlmekî û di her kareyê de emê li cihên ku wê şimikê pê lê kiriye binêriya, meyê bikira fêm bikira ew cih, war, ew deng, ew ba, ew serhildan, ew egîd tevî xwefiroşên di nav wan de veşartî...
Encam ne bi dilê me be jî gotina Şêx Seîd, "Xwedê bike ez gavên xêre bi vê şimikê bavêjim" hatibû cih; bi wê şimikê gelek gavên xêre avêtibû û wan şimikan kiribû ku em hêjî ne Şêxê xwe, ne jî wan şimikan ji bîr bikin.
Ji bo careke din xwendina rêzikên li ser şimikê û gelek sembolên din hûn dikarin çavekî li romana Jan Dost "3 gav û 3darek" bigerînin.
3 gav û 3darek / Jan Dost / Weşanên Avesta / Roman / 214 rûpel
.jpg)
