Hekîm Sefkan / Tava Heyvê

Bi ya min mijareke pir girîng heye, ku wekî gelek mijarên din, ew jî ji mij ve ye gotûbêj li ser dibin û her wiha wekî mijarên din çare ji pirsa wê re nayê dîtin.
Dibe ku ji ax yan jî ji ava welatê me be ku çare ji tiştên hêsan re nayên dîtin.
Ez nizanim gelo haya her kesî ji çêkirina stranekê heye an na? Ji bo çêkirnia stranekê çiqas dem divê, çiqas teknîka nivîsandinê dixwaze, bi taybetî dema ku melodî hebe, li gorî wê, bi cihkirina peyvan? Ji vê bêhtir dema ku stranek hatibe nivîsandin, lê ji her hêlê ve tevlihev û ne bidawîkiribe, gelo çiqas dem dixwaze, ji bo serastkirin û temamkirina wê? Ji xwe ku bestekar 8 - 9, carna jî 11 saetan li restorantê kar bike, gelo dikare di cih de daxwaza stranbêjan pêk bîne?
Bi salan e ku dema hinek heval stranekê dixwazin, ez hêvî dikim ku melodî hebe, ji min re bişînin, hem jî bila di dema amadekirina repertûarê de be, lê mixabin ku hîn heya niha jî hinek stranbêj ji vê meselê pir dûr in.
Bi kurtî ez bêjim, ne profesyonel in.
Tiştê ku hişt ez vê mijarê bigirim destê, berhema hunermendê hevalê min Xemgîn Bîrhat e.
Di albuma 2001’ê de, nayê bîra min lê min piraniya stranên Xemgîn sererast kirin, hinek jê jî min sê parên wan guhertin. Berhem derket, lê Xemgîn, strana ku ez bi kêmanî hefteyekê li ser xebitîbûm, wekî ku wî nivîsîbû, yanî wekî berê strabû. Wiha jî gelek stranên din jî. Tevî ku êdî tu keda min di berhema wî de nema bû jî, dîsa camêr spasî kiribû, mala wî ava...
Û îsal, berî çend mehan, me li Kolnê hev dît, xwest ku ez çend malikan ji straneke wî re binivîsim. Melodî temam bûbû, ne tenê wiha, di studyoyê de enstrumen hemû lêxistibûn, aranje bûbû, nîvê wê jî hatibû nivîsandin, encex dema min pirsî; tuyê kengê bixwînî, got ku amadebe îro, nebe jî çend rojên din?!
Gelo Xemgîn di rojekê de ew melodî amade kir, aranjeya wê, enstrumanên wê? Hemû di nava çend rojan de bûn? Çima bi mehan demê ji wan tiştan re vediqetînin, lê ji bo peyvan, îro yan jî çend rojên din? Gotinên stranê wiha erzan in?
Berî çend rojan hevalekî ku di telefonê de ji min pirsî te çi kir? Min got, min çi çi kir?
Ji min re got ku stranek ser e-maila min şandiye, ji bo sererast bikim?! Di e-maila xwe de dibêje, ji kerma xwe re zû vê stranê sererast bike, emê bikin klip...
Baş e, em her dem hev dibînin, te rojekê behs nekiriye, ji xwe wê demê jî ez di provayên muzikê de bûm, min înternet jî venekiriye...
Hevalê min gotinek din jî lê zêde kir: Xemgîn digot min ew malikên ku Hekîm nivîsandibûn nexwend, dereng ket, hem jê tu t.... di Hekîm de nemane?!
tarîbû ezman
bombe dibarin
bê navnîşan in ew,
û bê jimar in rengê mirinê,
bê şerm û har in
bi ser çiyan û daran de
bi kîn dibarin
me sondxwarî
bi av û ba,
bi ax û bi ar
nobedar in
cihbilind in
tu car nayên xwar.
Ev çend malik bûn ku min ji xemgî re nivisîbûn, ez nizanim, xwendiye an na, ji ber ku min hê li albumê  guhdarî nekiriye.
Dema ku stranbêj ji me stranekê dixwazin mîna ku pizza(pitza) bixwazin, bela pîvaz hindik be, îsot pir be, penîr nizanim çawa be...heya kengî wê wiha be, ez jî nizanim.
Ji ber ku ez di metbexa stranê de me, loma berî her kesî ez bi vê diêşim.
Helbet gotina min sedî sed ne tenê li ser Xemgîn e, wiha jî ne li ser hemû stranbêjan e. Di vê hêlê de yê herî perfesyonel nêzîkî stranê dibe yek jê jî Xelîl Xemgîn e.