Nûçe çi ye? Ji bo yên nizanin:
"Gorran hêza çekdarî pêk tîne!
Tê gotin ku Gorran dixwaze hêzeke çekdarî pêk bîne ji bona “parastina xwe!” Fermandeyekî Pêşmerge jî dibêje, divê Wezareta Pêşmerge li ser wê mijarê helwesta xwe nîşan bide." (1)
We niha fêm kir çima ev sernav me bikar anî?
Werin em hinek din fireh li meseleyê mêze bikin.
Di sala 1992'yan de kurdên Başûr bi xêra Amerîka (DYA) mafê xweserî girtin (ne ku ez dibêjim têkoşîn nedan û ez vê piştguh dikim, na, ez tenê qala realiyetek dikim). Wê çaxê dest pê nekirin û artêşek ava nekirin. Û tiştên din jî.
Sal 2003:
Dema sal bû 2003, erê erê di sala 2003'yan de DYA'yê Sedam ji kar girt û pêre rêya serxwebûnê li pêşberî kurdên me yên Başûr vebû. Lê wan çi kir?
Rabûn artêşek yekbûyî çêkirin? Na. Berevajî vê PDK'ê pêşmergeyên xwe, YNK'ê pêşmergeyên xwe xurt kirin.
Pirs ev e: Li dinyayê welatekî heye ku du artêşên wan hebin? Na. Wê çaxê dê çawa welatek ava bikin? Helbet dê nikaribin. Dema li cihek du artêş hebin gelo mimkûn e yek xiyanetê bike, yek berxwe bide? Belê. Jixwe kirin jî. Piştî van ma muhim e kîjan alî xiyanet kiribe? Na. (Ev ji bo yên dixwazin li Rojava jî du artêş hebin bersivek e)
Sal 2003:
Her du partiyên sereke PDK û YNK rabûn "Başûrek" yek parçe çêkirin? Na. Çi kirin? Yekî dest danî ser Xeta Zer, yekî dest danî ser Xeta Kesk. Li dinyayê welatekî wisa parçeyî dikare bibêje ezê welatekî azad ava bikim? Na. Wê çaxê çima di referandûmê de gotin?
Sal 2003:
Aboriyeke neteweyî çêkirin? Na. Çi kirin? PDK'ê ji xwe re neft firot û deriyên sînor bo xwe bikar anîn, YNK'ê ji xwe re neft firot û ket dû berjewendiyên xwe. Ma aboriya welat ku li ser petrolê be û partî ji xwe re parve bikin li wir welatek yekbûyî ava dibe? Helbet na.
Di rewşek wisa de kes dikare ji kesî hesabê bipirse? Na. Jixwe kes napirse jî, bi gotineke din newêre bipirse jî.
Sal 2003:
Yek bi yek ji gelê başûr heta rêveberî kesî bala xwe da çandinî? Na. Tiştek ajotin? Na. Çi kirin? Her tişt, hema her tişt yan ji Îranê, yan jî ji Tirkiyeyê kirîn. Tiştê herî biçûk, belê hêk (2) jî ji Tirkiyeyê kirîn. Ma welatek wisa dê çawa bibe dewlet? Helbet wê nebe.
Sal 2003:
Her du partiyên sereke rabûn rihek neteweyî çandin li nav gel? Na. Çi kirin? Partîcîtî kirin. Ma wisa dibe? Na.
Em vegerin serî.
Îsmaîl Beşîkçî wisa dibêje: "Ji bo ragihandina serxwebûnê Artêşa Kurdistanê lazim e, çekên giran lazim in." Ger ev gotin rast be ku li axek wekî Rojhilata Navîn ev sedî sed rast e Başûr bê artêşek yekbûyî dê çawa bibe serbixwe? Tu artêşek yekbûyî saz nekî tu hezar referandûman jî çêbikî li herêmekî wekî Rojhilata Navîn tuyê çawa bibî serbixwe? Tu nikarî bibîm. Ev teqez e.
Tu ji 25 salan zêdetir bi awayekî fermî herêmê bi rê ve bibî (wekî herêma xweser, dûre wekî herêma federal) û tu nikaribî artêşek yekbûyî çêbikî, tu nikaribî aboriyeke neteweyî çêbikî, tu nikaribî herêmê ji "du parçebûyî" bikî yek parçe tuyê çawa welatek serbixwe çêbikî? Tu dixwazî bila navê te Barzanî be, yan Telebanî be, yan tiştek din, ma ferq dike? Û piştî biryara ku te da te sedî 51 zêdetir axa xwe winda kiribe û sedî 50 zêdetir aboriya xwe ji dest dabe tu hê çawa li ser kar î?
Piştî ewqas belavbûyînan ji bilî ev du partiyên zêdetirî 25 salan li ser kar in partiyek din rabe artêşek ji bo xwe ava bike tuyê li gor kîjan zagonê bibêjî "Na tu nikarî ava bikî?”
Tuyê li gor kîjan meşrûbûnê rabî bibêjî "Na tu nikarî ava bikî?"
Ha, em bibêjin yê we her du partiyan hêza we ya çekdar heye, hûn bi awayê demokratî bifikirin û bibêjin "Belê rast e, mafê wan e jî" û destûrê bidin wê jî, sibê partiyên îslamî jî rabin bibêjin "Em jî tiştek wisa dikin" hûnê çi bibêjin?
Bi kurt û kurmancî: Pêdiviya kurdên Başûr êdî ne bi pêşmergeyên PDK'ê û ne bi pêşmergeyên YNK'ê hene. Pêdivî pê heye ku her du jî pêşmengeyên xwe belav bikin û ji nav yên dikarin vî karî bikin artêşek ava bikin. Ger wisa nebe îro Goran wê bixwaze tiştek wisa ava bike, sibê Yekgirtû, du sibê Nifşê Nû, sêsibê yeka din...
Niha pirs ev in: Hûn destûrê didin Goran ew jî “pêşmergeyên xwe” ava bikin yan hûn ên xwe jî betal dikin û artêşek yekbûyî ava dikin? Ger hûn destûrê nedin Goran divê hûn ên xwe jî betal bikin û artêşek yekbûyî ava bikin, ger hûn destûrê bidin Goran sibê yek ji yên îslamî jî wê rabin ava bikin û hûn nikarin bibêjin na. Rê li ber we ye.
Ha, hûn dikarin bibêjin “Ev meseleya nava me ye, çi karê we bakuriyan pê heye?” Wê çaxê emê bibêjin biborin û li cihê xwe rûnin.
Ka hûn çi dibêjin?
1- Gorran hêza çekdarî pêk tîne!
http://www.basnews.com/index.php/kr/news/kurdistan/437834
2-
Notên ji Duhokê, welatek hêkan jî ji derve bikire?! (Cemil Oguz, Diyarname)
http://diyarname.com/article.php?Idx=5302
3-
Bûyera Ferhat Sangewî û em nizanin referandûmê jî çêbikin Notên ji Duhokê, welatek hêkan jî ji derve bikire?! (Cemil Oguz, Diyarname)
http://diyarname.com/article.php?Idx=5335
.jpg)
