Bi destûra we ezê hin tiştan rêz bikim ku heta niha ez tênagihêm ku çima wisa ye.
Amed Spora bi tirkî
Amed Spor tîmekî kurdan e. Bênîqaş hemû kurdên hezkirên fûtbolê yên li Bakur ji Amed Sporê hez dikin û bi serketinên wê serbilind dibin. Nav ne hewceye lê heta niha nivîskarên sporê yên kurd ku li ser Amed Sporê nivîsîne ew şibandine Atletico Bilbao (Tîma herêma Baskê), yan jî Barselonayê (Tîma herêma Katalonyayê). Van nivîskaran xwestine Amed Spor jî bibe tîmek wisa. Ev her du tîmên navborî di klûbên xwe de ne zimanê serdestan lê zimanê xwe bikar tînin. Heta vir tiştek şaş nîn e. Şaşî di vir de ye: Niha nivîskarê kurd Alî Fîkrî Işik li ser Amed Sporê bi navê "Amed Spor Kaos ve Direnîş" pirtûkek nivîsî lê bi tirkî. Çima?
Fîlmê li ser Qazî Mihemed
Derhênerekî bi navê Muhammet Arslan ev demek e ji ser tora civakî re ragihandiye ku ew dixwaze li ser Qazî Mihemed fîlmekî bikişîne û ji bo der û dorê alîkarî dixwaze. Heta vir tiştek normal e, lê li vir du tişt derdikevin holê:
Yekî ji ser twitterê re pirsî bû, "Dê zimanê fîlm bi kurdî be?" derhêner ev bersiv dabû, "Em hê nehatine wê astê." Yanê çi?
Ya diduyan derhêner fîlmê "Kanli Postal" kişandibû bi vê tiştek nexist ser bêjingê û bi qasî em dizanin di warê sînemayê de serketineke mezin a birêz Arslan jî nîn e. Çima ew fîlmê Qazî Mihemed bikişîne?
Hunermendên kurd bi tirkî diaxivin
Dema me got huner gelek cure dikevin navê. Ji şano heta muzîkê, ji wêne heta peykersazî... Hunermendên kurd ên bi kurdî distrên jiyana wan bi tirkî ye. Di jiyana wan de tirkî serdest e ne kurdî. Wê rojê li strana stranbêjeke kurd guhdarî dikim, min dengê muzîkê heta dawî bilind kiriye. Stran xilas, berî derbasî strana din bibe çend sanîyan bêdengî hew min dît dengê "Super Oldu" ji wê stranbêjê hat. Çima?
Pêşî bi zarokên xwe re bi kurdî biaxive
Nivîskarên kurd hene zarokên wan bi kurdî nizanin. Çima nizanin ji ber ku dê-bav bi wan re bi kurdî xeber nadin loma. Wê çaxê tu çima ji min re dibêjî bi kurdî binivîse, biaxive? Ka serê pêşî tu wê kurdiyê bi zarokên xwe bide hînkirin. Yan na ez çima bi kurdî biaxivin. Ne?
Î.X.Baran çima bi tirkî dinivîse
Nivîskarên kurd di hesabên xwe yên tora civakî de çima bi tirkî dinivîsin? Mesela Îbrahîm Xelîl Baran... Nivîskar e, serokê partiyeke kurd e û xwe ji her kesî zêdetir Kurdistanî nîşan dide. Û radibe bi tirkî dinivîse. Ka çima?
Ger hûn bêjin te çima qala wî kir, ezê bêjim a rast carinan tiştên xweş dinivîse, loma hat bîra min.
Şîr û hêk
Hefteyek berê ji Duhokê dîsa çend mêvanên min hebûn ku didu jê yekem car ez dibînim. Berî her tiştî ez pirsa "Tu çi karî dikî?" dikim. Got: Ez dondirme (bestenî) çêdikim û difroşim. Ticareta wê dikim. Min got hûn şîr ji ku digirin, got ji Îranê tê. Ez hîn bûm ku ji şîr heta qutîkên dordirmeyê, her tişt ji Îranê tê û ew tenê li wir çêdikin û li der û dorê belav dikin.
Hêk jî ji Tirkiyeyê diçin Başûr. Çima?
Nivîskar çiqas pirtûkên xwe dişopînin?
Gelek nivîskarên kurd hene pere didin weşanxaneyan, weşanxane pirtûkên wan çap dikin û jixwe re difroşin. Ew nivîskar qet napirsin te çend heb ji vê pirtûkê çap kir, çiqas belav kir, te şand ji rojnamegeran re yan na? Çima li cihek hema nûçeyek biçûk jî derneket? Ez fêm nakim, bîr nabin, yan di asta "hema bila pirtûk derê bes e" de ne.
Aliyê din ê meseleyê jî ev e: Weşanxane qet ji xwe re nakin kurm ku pirtûkek ji rojnamegerekî/e kurd re bişînin ku nûçeyek wan çêbe. Çima
A rast gelek tiştên ku ez tênagihêm hene, lê hema hin min rêz kirin. Dibe ku pirsgirêk di min de be... Nizanim. De wekî mezinan gotiye "De a bixêr."
.jpg)
.jpg)
