Pêşî em wisa bibêjin: Tu armanceke HDP û EMEP'ê heye ku ji Tirkiyeyê veqetin, tu biryar, zagon, hikumetên Tirkiyeyê qebûl nekin, di nav siyaseta Tirkiyeyê de cih negirin?
Bersiva van pirsan NA ye. Wê çaxê divê siyasetê jî bikin, di nav hikumetê de jî cih bigirin, heta bikaribin para dijberên xwe ji wan bigirin û bikin a xwe.
Mesele ev e: Ji ber ku partiyan nekarî hikumeta koalîsyonê çêbikin li gor Zagona Bingehîn a Tirkiyeyê "Hikumeta Hilbijartinê" çêdibe, li gor dengên ku girtine wezîr li wan partiyên di nav meclisê de tê parvekirin. Ji van ji bo HDP'ê jî 3 mebûs dikevin. Ew mafê HDP'ê ye, wekî şîrê helal e.
Em mînakek wisa bidin: Li holê maseyek heye, li ser maseyê xwarinek heye, ji wê xwarinê beşek para te dikeve, tu wê xwarinê nexwazî ew ji te diçe, dibe para kesek din; her ew xwarin tê xwarin. Wê çaxê tuyê çima wê xwarinê nexwî, yan jî bi hevalên xwe nedî xwarin? Em xwarinê di wateya "rayeyê" de wekî mînak didin, ne ku di wateya xirab de. Bi gotinek din ew raye her li wir e, gere kes wê bikar bînin, çima ji dêvla me de hinên din wê rayeyê bikar bînin? Ma em dê heta kengî ji desthilatdarî dûr bin, nebin desthilatdar, yan şîrikê desthilatdarî.
Em dîsa vegerin xwarinê: Heta niha li dor wê maseyê, li ser wê xwarinê gelek tişt hatin axivîn, carinan biryar hatin girtin lê tu demê me nizanî çi hat axivîn, der barê qedera me de çi biryar hat girtin... Lê niha dema ji te jî 3 kes hebin,
A- Em dê bizanibin li wir çi tê axivîn, ew sê kesên te çawa ji wir derkevin dê me agahdar bikin ku tiştek baş hatine axivîn, yan na. B- Dema biryarek bê girtin biryar baş e ew 3 kesên te jî dê piştgirî bidin, baş nebin dê dij derên heta ji wan hat.
Niha bi cihnegirtina di nav Hikumetek wisa de, cihnegirtina li dor wê maseyê tê wateya ku em para xwe naxwazin û em dixwazin para me jî ew bixwin.
Têkoşîn wisa nabe. Ger em ji AKP'ê hez nakin, em dijî AKP'ê ne em çima hemû biryaran bidin destê wê, em çima parek jê negirin, ku ew par çiqas dibe bila bibe... Gelo bêsebeb Burhan Kuzu yê AKP'yî dibêje "HDP di nav hikumetê de cih negirta dê baş ba." Yalçin Akdoganê neyarê HDP'ê jî wisa dibêje, "Ketina HDP'ê ya di nav hikumetê de sûcê MHP'ê ye, guneh di stûyê MHP'ê de ye. Me got werin em hikumetek ji bo pêşhilbijartinê çêbikin jî MHP nehat."
Bi kurtahî tê dîtin ku ji bo HDP di nav Hikumeta Hilbjartinê de cih negire çi ji AKP'ê hat kir. Û bi ser de jî EMEP'a me naxwaze di nav hikumetê de cih bigire, bi awayekî ber bi polîtîkaya AKP'ê ve diçe.
Em balê bikişînin ser hin xalên din jî:
Dema diyar bû ku dê Hikumeta Hilbjartinê çêbibe û 3 wezîr ji bo HDP'ê dikevin, HDP li hev civiya. Biryara cihgirtina di nav hikumetê de tirs xist dilê AKP'ê. Di nav civîna ku çêbû de Leven Tuzel jî hebû, pêkhateyên din jî. Wisa diyar e ku li wir, an li cihek din Tuzel û partiya wî EMEP'ê negotiye "Em di nav hikumetê de cih nagirin" ku bigota dê Demîrtaş negota "78 hevalên me jî hemû yek in, pêşniyar ji bo kîjanê bînin dê bi awayekî baş bikaribin me temsîl bikin." Jixwe dema navê Tuzel diyar bû, Tuzel bixwe got, "Biryara partiya me heye, emê têde cih bigirin û bi awayê herî baş temsûl bikin." Û rojek din zivirî.
Pirs ev e: Ger hûn berê de fikra xwe diyar nakin, dema biryar tê ser we hûn çima bi paş ve gav diavêjin? Çima ji dêvla 3 kesên HDP'yî dê 2 kes cih bigirin? Gunehê wê ne di stûyê EMEP'ê de ye? Mînak ji herêma ku Tuzel jê hatiye hilbijartin gel rabe bibêje "Ji bo tu min li her derê temsîl bikî min deng da te, tu çima mafê min bi ser AKP'ê ve dişînî?" dê çi bibêje?
Ha, gotinek din jî wisa dibêjin, "Hikumeta di karaktera hikumetek êrîşa gel dike de ji bo demekê be jî cihgirtinê em rast nabînin."
Yanê? Yanê HDP di nav hikumetek êrîşê gel dike de cih digire, lê em rast nabînin û cih nagirin. Berevajî vê Berdevkê HDP'ê Ayhan Bilgen wisa got; "Em ji bo şer bidin rawestandin, tam jî ji bo berpirsiyarî bigirin û vînê derxin holê. Ji bo şer bidin rawestandin me biryar da ku di nav hikumetê de cih bigirin."
1- Diyar e ev ne hikumetek ji bo şer e û ne Hikumeta Şer e. Hikumetek e ku Tirkiyeyê bibe hilbijartinê, ji bo hilbijartin adil derbas bibe wê tevbigere (tevbigere negere ew tiştek din e). Em bibêjin HDP ket navê û dît ku dibe Hikumeta Şer, ma îstîfakirin zehmet e?
2- Em bibêjin hikumeta şer e. Tu di nav de nebî jî heman hikumeta şer e, lê tu di nav de bî belkî tu bikaribî hinek muxalefetê bikî, tu bikî ku ew ji ser wê rê vegerin. Lê niha tu nikarî wê jî bikî.
3- Dê hikumet Tirkiyeyê bibe hilbijartinê, tu cih bigirî belkî tu bikî ku hinek adil tevbigerin, tu cih negirî jixwe hemû raye di dest wan de ye, dê wekî berê bi ya xwe bikin.
Û 4- Cihgirtina di nav hikumetek wisa de ne bi daxwaza AKP'ê ye, bi ked û têkoşîna ku te daye ew maf ji bo te hatiye. Cihgirtin nabe piştgirî ji bo polîtîkayên AKP'ê, berevajî dibe ku tu bikaribî dijî van polîtîkayan derê.
Bi kurtahî: EMEP'ê pêşî golek avêt qeleya xwe û dûre jî avêt qeleya HDP'ê. Û dubare: Ger berê EMEP'ê bigota em cih nagirin, dê Demirtaş ne qala 78 mebûsî, dê qala 77 mebûsî bikira û niha dê ne 2 mebûs, dê 3 mebûs di nav Hikumeta Hilbijartinê de ba.
Bi ya min EMEP'î bixwe divê vê biryara EMEP'ê û Tuzelî şermezar bikin.
***
Em niha hin xeyalan bikin: Îro li Geverê sivîl hatin kuştin. Mebûsên HDP'ê çûn lê demek dirêj nehiştin bikevin navçeyê. Dema 3 wezîrên te hebin ne wekî mebûs, wekî Wezîr tu dikarî li ber deriyê Geverê bî, ev jî tiştek din e.
Wezîr çi be bila bibe, 2 meh ji bo hilbijartinê, mehek jî heta hilbijartin xilas bibe û hikumetek nû çêbe, herî hindik ev hikumet dê 3 mehan bidome û di van 3 mehan de ew wezîr belkî bikaribe hinek tiştên baş jî bike.
Welhasil, qewlê pîra min re got; "Ez çi serê we biêşînim", çi bibêjim jî ji niha û pêde bêfêde ye.
***
Têbinî: Min dê vê hefteyê li ser Serokatiya Mesûd Barzanî binivîsanda, lê ev ket navberê, belkî hefteyek din...
.jpg)
