Berî em bibêjin ev ji ku derket, em pêşî hin gotinan bibêjin:
Kurd çima xwe wekhev nabînin û çima xwe û serdestên xwe wekhev nabînin? Çima serdestên xwe ji xwe bilindtir, jîrtir, zanatir, lê gelê xwe ji xwe biçûktir, kêmaqiltir dibînin?
Çima berhemên xelkê serketî, lê qet nafikirin ku di nav berhemên wan de jî serketî hene?
Siyasetmedarên xelkê jîr, lê yên xwe her hêjayî rexnekirin û biçûkdîtinê dibînin?
Çima dema nûçeyek di çapemeniya serdestan de dibînin pê bawer dikin, lê ya xwe de dibînin wekî tiştek ji rêzê dibînin?
Çima ji xelkê re dibêjin "Beg" lê ji xwe re jî dibêjin "Ji kurdan tiştek dernayê"? Yan jî "Kurd nabin însan"?
Çima nikarin xwe jî di asta serdestên xwe de bifikirin?
Çima nikarin bibêjin "em wekhev in, tu, bi tu tiştek xwe jî ji min ne mezintir, ne bilindtir, ne birûmetir î?"
Û pirsa dawî: Heta kengê dê xwe ji serdestên xwe biçûktir bibînin?
Çi yê kurdan ji ereb, faris, tirk, îngilîz, alman kêmtir e?
Ma hewce dike em pirsan zêde bikin?
A rast wekî şexs min tu demê xwe ji serdestek xwe biçûktir nedîtiye. Ha, min xwe mezintir jî nedîtiye...
Ez li ser wê fikrê me ku kurd di bin her şert û mercî de xwe ji serdestên xwe biçûktir nebînin. Kurdê ku xwe biçûktir bibîne ew ne tu tişt e.
Em vegerin serî: Ev ji ku derket?
Rêzefîlmekî bi navê "Mucîze Doktor" heye, niha bi tirkî tê kişandin û weşandin. Ji versiyona "The Goog Doctor" hatiye girtin û li tirkî anîne. Di beşa êvara 19.12.2019'an de serkarakter ku yekî otîzmî ye wisa got: "Carek ji min re wisa gotibû, 'Em wekhev in'. Min gelek ji vê peyvê hez kir, ez dixwazim wekhev bim."
Otîzmî dixwaze wekî kesên ji rêzê, wekî her kesî, ligel wan wekhev be.
Ev mafê wî ye, mafê her kesî ye. Bi her awayî, bi her tiştî, mafê wî ye. Mafê kurdan e jî. Lê gelo kurd dixwazin "wekhev" bin?
Helbet yên dixwazin hene û gelek in. Lê piranî ne gelo?
Di laşê mirovan de her tişt ji serî dest pê dike. Ger aqilê di serî de fermanê nede laş nikare ji cihê xwe tevbigere. Lê dema ew aqil fermanê dide laş tevdigere. Yê me jî di serî de dest pê dike. Ger di serî de em nebêjin "Em wekhev in" ka emê çawa bibin wekhev...
Welhasil... Yan jî, dev jê berdin, ne min pirsî, ne hûn bifikirin.
.jpg)
