Siyasetmedar ne xwedî şiyan in ku bikaribin çarenûsa nirxê nivîskariyê diyar bikin. Ê ku çarenûsa siyaset û siyasetmedaran diyar dikin nivîskariya wî miletî ye. Ji bo vê sedemê jî, divê tu daxwazek kurdînûsan ji siyasetmedaran nîn be da ku di biniya konê xwe de ciyekî ji wan re veqetînin û bangî wan a li ser sifreyê bikin.
Nivîskariyek ku nirxê wê di biniya sîwana siyasetê de bê diyarkirin, ew nivîskarî nivîskariyek mirî ye. Ê ku hişmendiya civakî, asta zimanî berjor û berze dikin ne siyasetmedar lê nivîskarên wê civakê ne, ku bi nivîsên xwe hem asta zimên berze dikin û hem jî bi ramanên xwe, hişê civakê yê kolektîf jî pêş ve dibin.
Nivîskar, bi berhêm xwe ên hilberandî nirxên xwe ava dike. Ew aîdî berhemê xwe ye. Hewşa nivîskarî berhemên wî ne û ew ji wî welatî ye, ê ku di berhemên xwe de wê dişayesênî.
Ciyê nivîskêr a ku şayanî wê ye, dê zeman diyar bike. Mixabin ku îro xwînêriya kurdî zêde ne baş e. Ku xwînêriyek kurdî baş hebûya, dê siyasetmedar nikarîbûna nivîskariya kurdî ji nedîtî ve bên. Ger xwînêriyek kurdî baş hebûya, dê siyaseta kurd û siyasetmedarên kurd li du kurdînûsan bigeriyana, da ku wan bipesînin û pê ve jî da ku nirxên wî/ê bê pesend kirin û ji raya giştî re bê eşkere kirin, da ku bikaribe demek dirêjtir li ser karî bimîne.
Bi vê nîqaşa ku hatiye destpêkirin, em dikarin bi dilaramî bibêjin ku nivîskariya kurdî ne di biniya sîwana siyasetê de, lê di cih û warekî azad de zîl dide û şaxên xwe ber dide. Ev jî, ji bo niviskariya kurd, ciyê şanaziyê ye. Loma, nivîskariyek ku di sîwana siyasetê de zîl dabe, ew niviskarî, nivîskariya pabend e. Nivîskariyek pabend, dê ne bikaribe asta zimên berjor bike û ne jî dê bikaribe hişê civakî bi pêş bixîne.
Ez wekî xwînêrekî, pê nexweş im ku nivîskarên me yên hêja gazinên wiha ji siyaseta kurd dikin.
Helbet, divê sedemên ji nedîtî ve hatina siyaseta kurd, a kurdînûsiyê bê nîqaş kirin. Divê bi her awayî bê vekolîn, divê binhişiya vê nêzikatiyê bê vegotin. Lê divê, ev nîqaş ne di rengê gazindan de bin.
Ev nîqaş divê bikaribe bibe rêyek, ronahiyek, neynikek ku siyeseta kurd bikaribe rê, xeletî û rastiyên xwe tê de bibîne.
gernus@msn.com
.jpg)
.jpg)
