Em diçin û tên qala siyaset û şer dikin. Ka wekî din ji bo Rojava tu dikarî çi bikî?
Em diçin û tên qala siyesetê, qala şer dikin. Yên li dijî PYD û rêxistinên din jî, yên alîgirên PYD'ê jî heman tiştî dikin. Çima em qala tiştek din nakin?
Mesela bajarekî çawa tê bi rê ve birin? Ma tenê bi şer û siyasetê tê birêvebirin?
Em wisa bibêjin:
Hin nivîskarên me yên zikreş, hin kurdên me yên eletewş li dijî pergala li Rojava, li dijî PYD û hin rêxistinan in. Serçavan. Ew bi dilê xwe ne.
Em vegerin ser ên bê alî û yên alîgir...
Li Rojava niha pergalek saz bûye. Ew pergal tu dixwazî bila bibe pergalek xweser, bibe federatîf yan jî bibe parçeyeke Kurdistanê ya serbixwe... Çi dibe bila bibe, çima em tenê bi çavê siyasetê û şer lê dinêrin?
Çima em tenê dinêrin ka PYD di warê siyasî de çi dike? YPG çawa şer dike?
Qey ji bilî van tiştek din tuneye?
Mînak bajarekî çawa tê bi rê ve birin? Şaredariyeke çi karî dike? Çawa li ser binesaziyê dixebite? Çawa parkan çêdike? Rê bi çi û çawa têne çêkirin? Elektrîk û av çawa digihîjin malan...
Xwendina beşa pirtûkxaneyan
Em bêr ser xalek din: Mesela pirtûkxaneyeke çawa saz dibe? Pirtûk di pirtûkxaneyekê de çawa têne rêzkirin? Ev ne pirtûkxaneya li mala me bi xwe ye. Li Ewropayê li Zanîngehan beşa pirtûkxane xwendinê hene.
Çima yek ji wan nafikire û nabêje: "Waye li Rojava pergaleke xweser çêbûye (herî hindik li hin bajaran şer nîn e), ez herim wir, li ser pirtûkxaneyeke bixebitim, pirtûkxaneyeke ava bikim. Li cem xwe jî çend kesan bi awayekî profesyonel hînê vî karî bikim. Piştî wê vegerim Ewropaya xwe, yan jî bixwazim li wir bi cih bibim? Ma pêdiviya Rojava (kîjan bajar-navçe dibe bila bibe) bi pirtûkxaneyeke cidî nîn e?
Xebatkarên petrolê (neft)
Em bibêjin yên ku li ser petrolê ders dîtine, zanîngeh qedandine... Zanîna wan heye. Çima yek nafikire nabêje ez herim, waye li Rimêlan petrol jî di destê me de ye, ez herim hînê wan bikim ku petrolê derxin, bikar bînin? Ev jî ne xizmetek e...
Plankirina bajarekî çawa dibe?
Yan kesek ji zanîngehê beşa "Plankirina bajar û herêmê" xwendibe... Çima nabêje ez herim, ma pêdiviya wir jî bi sazkirina bajar, bi planên bajêr heye...
Endamên lijneyên hilbijartinê
Ji we re mînakek din: Niha tevgerên Rojava dibêjin di nav sê-çar mehan de emê hilbijartinê çêbikin. Çi li Bakur, çi li bajarên Tirkiyeyê, yan li Ewropayê... Kurdên di nav lijneyên hilbijartinê yên bajar an navçeyan de dixebitin nîn in? Helbet hene. Ka ji wan kî difikire here li Rojava, qet nebe li ser 'hilbijartin çawa bi awayekî demokratîk li dar dikeve' dersê bide û were... Ka kî difikire.
Em meseleyê hinek din pratîktir bikin: Em bibêjin kesek li zanîngeha Ewropayê beşa wergêriyê xwendiye. Çima nabêje Desteya Bilind a Kurd, çima ji PYD'ê re nabêje ez bêm Rojava, ji bajaran (her yekî bila kesek be) ciwanan li bajarekî kom bikin, ez li wê derê hefteyek, an mehekê dersa wergerê bidim wan û vegerim. Tecrubeya xwe par ve bikim lo..
Yan kesek li ser "têkiliyên gel" xwendiye, master kiriye... Çima heman tiştî neke.
Ma em mînakan zêde bikin? Ma hewce dike...
We got çi?
Em pirsa xwe dubare bikin: Qey li wir mesele tenê şer û siyaset e?
Wekî gotina dawî: Erê li Rojava pêdivî bi nan jî heye, lê nan tenê jî ne tiştekî. Bifikirin li welateki ger mejî ne têr be, zik têr be dê çawa be?
Ma hewce dike em her duyan ji hev veqetînin...
Em ji ku hatin ku...
Belê Rojava bi her alî ve li benda alikariyê ye...
cemilo@diyarname.com
.jpg)
.jpg)
