Li ser Başûr, li ser rêveberiya Başûr heta niha gelek tişt hatine gotin, dê hê bêne gotin jî. Xwediyê vî quncikî jî heta niha gelek tişt gotine û dê bêje jî. Lê îro em ji siyasetê dûr bala xwe bidin xalek din. Ew jî spor e.
Di dema ku maçên Euro 2020 didomin de, li dinyayê bi sed mîlyonan mirov li van maçan temaşe dikin de, em bi ser mînakeke re mijarê bigirin dest.
BUHAYA AMED SPORÊ
Li Tirkiyeyê "transfermarkt.com.tr" (1) îstatîstîkên li ser buhaya tîman belav dike. Li gor vê, buhaya Amed Sporê 2.14 mîlyon Euro ye.
Amed Spor di Lîga 2'yemîn a Tirkiyeyê de dilîze û ji bajarên Bakur bigire heta bajarên Tirkiyeyê kurd li ku dijîn dilê wan ji bo Amed Sporê lê dide. Kurdên li welatên din jî em lê zêde bikin ev digihîje asta mîlyonan kesî. Tîmek wisa çime neçe Lîga 1’emîn an jî Super Lîgê?
Li gor heman çavkaniyê buhaya tîmeke din a kurdan, buhaya Dalkurdê 2.10 mîlyon Euro, buhaya Diyarbekir Sporê ku îsal ji Lîga 3'yemîn derbasî Lîga 2'yemîn bû jî 475 hezar Euro ye.
XANIYÊN BARZANIYAN
Kovara Variety di sala 1905'an de li New Yorka DYA'yê hatiye derxistin, li ser şahî û ticaretê weşanê dike. Di sala 2019'an de nûçeyeke weşand ku malbata Barzanî li DYA'yê du xaniyên luks bi 47 mîlyon dolarî kirîne. Nûçe hê li ser malperê disekine û berevajî vê yekê tiştek nehatiye belavkirin jî.
Ji bilî wê jî tê zanîn ku rêveberiya Başûr heta niha gelek pere bê ku fêdeyeke wê ji bo gel hebe belav kirine. Niha pirsa me ev e:
Bi ev pereyên ku ji bo du xaniyên luks hatine xerc kirin rêveberiya Başûr dikaribû çend Amed Sporan bikire?
Dikaribû bi vî pereyî û pereyên din dikaribûn çend tîman rake ser lingan?
Mînak, dikaribû Hewlêr Sporê li dinyayê çiqas û heta ku navdar bike?
Ma ne, her kes dibêje rola sporê muhîm e? Ma ne ew Barselona ye ku bi navê wê Katalonya li dinyayê navdar bûye?
Ma li Spanyayê dema Real Madrid û Barselona bi hev re dilîzin li Hewrêlê kurd pevnaçin?
Binêrin nûçeya Rûdawê (3): "Qeymeqamê Hewlêrê Nebez Abdulhamid got ku duh 14 kes ji ber piştî maça Barcelona - Real Madrid bûyer derxistibûn hatin binçavkirin."
Çima ew pereyên ji bo xaniyên luks têne xerckirin ji bo sazkirina tîmeke mezin a li Başûr an li Bakur nayên xerckirin?
Dema wekî gel em fêdeya wan her du xaniyên luks û sazkirina tîmeke em qal dikin bidin berhev kîjan ji bo fêdeya gel e?
Pirsek din: Dema rêveberiya Başûr tîmek wisa mezin ava bikira dê navdartir biba, yan rêveberên Başûr ji bo şexsê xwe xaniyên wisa luks kirîne navdartir bûn?
Gelo hewce dike em pirsên din lê zêde bikin? Yan hûn dibêjin ne hewceye em pirsan jî bikin?
.jpg)
