‌HANA AZAD - Rojnews

Parlamentoya Herêma Kurdistanê piştî 13 saetan giftûgoyan, Kantonên Rojavayê Kurdistanê nas kir û daxwaz ji hikumeta Herêma Kurdistanê kir ku bi awayekî fermî têkiliyan ligel kantonan deyne.

Teksta biryara Parlamentoya Herêma Kurdistanê bi vî awayiye:

1- Parlamentoya Kurdistanê di her awayekî xwe rêveberinê de piştgiriya vîna gelê rojavayê Kurdistanê dike û pêwîst e Hikumeta Herêma Kurdistanê bi fermî têkiliyan deyne.

2- Pêwîst e hikumet li gor karînên xwe alîkariya darayî hevkariya Rojava bike.

3- Aliyên pêwendîdar vê biryarê bînin cih.

4- Kar bi tu tekst û biryarekê nayê kirin ku berevajî vê biryarê be.

5- Ev biryar piştî ku di rojnameya fermî Waqi'î de hat belavkirin, wê bikeve pratîkê û kar pê were kirin.

Di civîneke çapemeniyê de ji ber nasandina derbarê biryara nasandina Kantonên Rojava de, serokê hemû fraksyonên parlamentoya Kurdistanê pîrozbahiya xwe pêşkêşî Kantonên Rojava kir. 

Serokê fraksyona Tevgera Goran Rabûn Marûf di civîna çapemeniyê de wiha got: “Ji bo yekrêzî û berxwedana kurdan a li Kurdistanê, me ji ber axaftinên parlamenterekî xwe daxwaza lêborînê ji PDK û YNK’ê kir.”

Herwiha serokê fraksyonên di nava parlamentoya Kurdistanê de dubare kirin ku ev biryar di berjewendiyên rojavayê Kurdistanê de ye û em hêvîdarin ku ev biryar yekrêziya kurdan zêdetir bike.

Têbinî: Foto ji arşîvê, ji civîneke berê ye