Diyarname

Festîvala Rojava ya Çand û Hunerê li bajarê Sandviken ê Swêdê Di rojên navbera çardeh heta şazdê tebaxa îsal de14-16.08.2014, wê li bajarê Sandviken ê Swêdê, mîhrecana Rojava ya Çand û Hunerê lidarkeve.

Berî deh salan Kongreya damezrandinê ya Hevgirtina Rewşenbîrên Rojavayê Kurdistanê (HRRK) li bajarê Sandvikenê li dar ketibû û HRRK vê carê li heman bajarê festîvaleke li dar dixe.

HRRK ku piştî par rêveberiya xwe nû kir dest bi rêzeçalakiyan kiribû. Festîvala ku niha li dar dikev jî yek ji van rêzeçalakiyên HRRK’yê yên li bajarên welatên Ewropayê ye. Li ser festîvala ku dê li dar bikeve Berdevkê Hevgirtina Rewşenbîrên Rojavayê Kurdistanê Helîm Yûsiv agahî da me û her kes vexwend festîvalê. Yûsiv wisa got: “Çalakiyên wiha ji du hêlan ve girîng in: Ji hêlekê ve roleke mezin di geşkirina tevgera çand û hunera kurdî û belavbûna wê de dilîze, ji hêla din ve jî, derfetan li ber hemû kedkarên çand û hunera kurdî vedike, da ku hevdu bibînin û têkiliyên xwe yên berhemdarî bi hev re xurt bikin. Em bi dilekî germ bang li hemû kurd û sûriyên ku li der û dora bajarê Sandvikenê dijîn, ku beşdarî kar û barên mîhrîcanê bibin”

Festîval dê saet pêncê êvarê bi nîşandana tabloyên şêwekarên kurd, li salona hunerê ya bajêr, dest pê bike. Her wiha di her du rojên pazdeh û şazdeh yên gelawêjê de wê gelek semînerên wêjeyî û siyasî, şevbuhêrkên helbestê, çîrokê û şanoyan bêne pêşkêşkirin. Her wiha di nav re jî wê roj bi stran û muzîkê bêne xemilandin.

Di meha adarê de HRRK’ê li bajarê Wuppertal ê Almanyayê çalakiyeke çandî bi beşdariya çil helbestvan, hunermend û nivîskaran, bi awayekî serkeftî li dar xistibû. Li gor gotina Yûsiv li gor derfetê li bajarên cur bi cur ên Ewropayê dê çalakiyên bi vî rengî li dar bixin.

Ji bo têkilî:

Mîhrecana Rojava ya Çand û Hunerê Sandviken - Swêd

Dîrok:14-16. 08. 2014
Adress: Sandvikens Kulturcentrum Köpmangatan 3 811 80 Sandviken, Sverige

E-mail: hevgirtin@rojava.net