Diyarname

Ji bo derziyên vîrusê kampanyayeke hate dest pê kirin û hedef berhevkirina 22 mîlyar dolar e. Ji bo vê dê konserek li dar bikeve û hunermendên wekî Jennifer Lopez, Foo Fighters, Eddie Vedder, H.E.R. û J Balvin stranan bêjin.

Konsera bi navê "VAX Live: The Concert to Reunite the World" (VAX Live: Konsera Gihandina Hev a Dinyayê) wê 8 gulanê li dar bikeve û stranbêja amerîkî Selena Gomez dê pêşkêşvaniya wê bike.

Konser wê li Stada SoFi ya li Los Angelesa DYA'yê bê kişandin û ji ser radyo û Youtubeyên CBS, FOX û iHeartMedia ra bê weşandin. Ji bo alîkariyê bang hati kirin.

CEO'yê Global Citizen Hugh Evans gotiye ku li dinyayê 27 mîlyon xebatkarên tendurustiyê ku nikarin derzî peyda bikin û li xwe bidin hene. Evans bi gotinên xwe bal kişandiye ser giraniya meseleyê û ji bo  Associated Pressê wisa gotiye: "Ez 38 salî me û ne tiştek ehlaqî ye ku berî ev xebatkarên tenduristiyê yên leheng derzî li min bixin. Ji ber vê yekê bi lezgînî pêdivî bi alîkariya hikumetan heye ku derziyan tedarîk bikin."

Li aliyê din Evans gotiye ku hê jî derziya Covid-19 qet neçûye 60 welatan.