Diyarname

Balkêş e ajansên navneteweyî dema mesele tê ser kurdan ne li gor gotina kesê axivî, li gor xwe nûçeyê saz dikin. Niha du nûçeyên van ajansan wekî nûçeyên derewîn hatin îlankirin.

El Cezîre lêborîn xwest

5'ê vê mehê Hevserokê PYD'ê Salih Muslim bi vîdyo konferansê beşdarî konferansa ku li Amedê li dar ket bû. Muslim li wir ji bo Rojava got "Niha ne dema dewleteke serbixwe ye" lê ajansa El Cezîre ya Tirkî ev gotina Salih Muslim wekî ku ji bo başûrê Kurdistanê gotibe bikar anî û weşand. Ajansê îro (7'ê mehê) nûçeya "Rastkirin û lêborîn" weşand û ji Salih Muslim û raya giştî lêborîn xwest. Ajansê îdîa kir ku ji ber kêmasiyeke teknîkî û wergerê wan mesele şaş fêmkiriye, ji ber vê jî ew lêborînê dixwazin.

Resûl: Nûçeya Reutersê derew e

Nûçeya din jî nûçeya ajansa Reuters e. Reuters bi Cîgerê Sekreterê Giştî yê YNK'ê Kusret Resûl re axivî bû û gotibû ku Resûl gotiye; "Ji bo serxwebûnê hê ne dema wê ye."

Lê 7'ê mehê ofîsa ragihandê ya Resûl daxuayniyeke nivîskî weşand û diyar kir ku nûçeya ku Reutersê weşandiye derew e.

Ofîsê ragihand ku hema li nûçe û daxuyanên Resûl ên berê jî bê nêrîn dê bê dîtin ku 15 sal in ew bi eşkere alîgirê serxwebûna Kurdistanê ye.

Her wiha di daxuyaniyê de hate gotin ku Kusret Resûl di warê referandûmê de bi Serokê Herêma Kurdistanê re li ser heman baweriyê ye, yanê hemfikir e.