Îzzettîn Oktay

Her roj derbarê jiyana kurdewarî de pirtûkên nû derdikevin. Niha jî nivîskarê kurd endazyarê çandiniyê Mehmet Emîn TUNÇ cara yekemîn bi zimanê kurdî pirtûka çandiniyê ya bi navê “ÇANDINA TENE (Genim, Ceh, Nîsk û Nok)” nivîsand.

Nivîskar Mehmet Emîn TUNÇ ji bajarê Amedê ye. Zanîngeha Yuzuncu Yil a Wanê Zankoya Çandiniyê beşa Nebatên Zeviyan qedandiye. Niha jî wekî endazyarê çandiniyê li bajarê Amedê xebatên xwe didomîne. Tunç pirtûkek nû û ji cureyek ku heta niha li ser nehatiye nivîsîn diyarî zimanê kurdî kir.

Pirtûka yekemîn bi zimanê kurdî derbarê çandiniya teneyan de derketiye “ÇANDINA TENE (Genim, Ceh, Nîsk û Nok)” ji hêla Weşanên Arvîn ve li bajarê Stenbolê derket.

Nivîskar Mehmet Emîn TUNÇ derbarê vê pirtûkê de dibêje; "Ji bo pêşketina zimanê kurdî û bi awayekî hêsanî cotkarên kurd bikaribin xebatên xwe yên çandiniyê pêkbînin li ser vê pirtûkê min dora pênc salan xebat kiriye."

TUNÇ derbarê naveroka pirtûkê de jî wiha axivî: “Çandina tene ji bo çi tê kirin? Amadehiyên çandinê çi ne, çawa bi kar tên? Nexweşî,  kêzik û kurmikên çandinê çi ne? Li ber van kêzik kurmik û nexweşiyan çawa û bi çi têkoşîn tê kirin? Ji bo berek baş û pir ji çandinê bê bi destxistin cotkar divê çi bikin? Avhewa (îqlim) li ser çandinê bandorek çawa dike? Çandin di axek çawa de bê kirin baş e? 

Kîjan tene axek çawa dixwaze? Kîjan wext(dem)ê de di nava çandinan de cotkar kîjan karî bike? Tene kengê tên avdan? Gubre kengê biavêjinê? Erd kengê werin rakirin û ajotin(cotkirin)? Çinîna teneyan çawa û kengê pêkbînin? Di embarande li çi miqatebin (baldarbin)? Di pirtûkê de em dikarin bersiva van pirsan û pirsên wisa bibînin.”

Pirtûk ji kaxeza kuşe, bi wêneyên rengîn hatiye xemilandin. Di pirtûkê ku ji 80 rûpelan pêk tê de taybetiya herî mezin jî ew e ku derbarê çandiniya nebatan de ferhengokek ji 12 rûpelan pêkhatî hatiye amadekirin û di dawiya pirtûkê de hatiyeweşandin.

*** 

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.