Diyarname
Sê albumên nû 'Leylan'a Ayfer Duzdaş, 'Wenda'ya Mehmet Atli bi etîketa Kom Muzîkê û 'Natirsim'a Diyar bi etîketa Kom û Mîr Muzîkê derketin.

Yekem album: 'Leylan'

Hunermend Ayfer Duzdaş salên dirêj e di nav muzîka kurdî de ye. Di bin banê NÇM'ê (Navenda Çanda Mezopotamyayê) de di Koma Vengê Sodirî, Koma Asmîn de cih girt, di nav gelek projeyên cur bi cur de cih girt. Duzdaş niha bi yekem albuma xwe ya solo derket pêşberî hunerhezan.
Di albuma ku navê "Leylan" lê kirine de 13 stranên cih girtine. Ji wan gotinên stranên 'Çarşemê' û 'Ûskira' aîdê Cemal Çelebî, strana 'Dîcle' yê Dayika Dîcle ye û stranên din gelêrî ne. Stranên albumê ji çar parçeyan hatine berhevkirin û bi kurmancî, zazakî û soranî hatine xwendin. Êş, hesret, evîn bi dengekî dilşewat hatine vegotine.
Aranjoriya albumê Mustafa Bîber kiriye û rengeke modern, bêyî reseniya kurdî winda bibe li albumê kiriye.
Duzdaş bi dengê xwe yê orjînal, cihêreng rih daye stranên 'Dotmamê', 'Dîcle', 'Çarşeme', 'Dîlber', 'Çil Mercan', 'Ay Dal Leyro', 'Ziravê', 'Laylayê', 'Qeqibo', 'Leyro Leyro', 'Kamel', 'Ûskira' û 'Xurnîk'

Ji dengê evînê 'Wenda'

Mehmet Atli di nav muzîka kurdî de ciheke girîng digire. Atli bi rihê evînî stranan dibêje, evînê pêşkêşî guhdaran dike. Piştî "Jahr"ê Atli vê carê dibêje "Winda".
Di albumê de 12 stranên bi navê 'Ya Erê Ya Na', 'Pismamo', 'Wenda', 'Kennêr', 'Şino Nino', 'Name', 'Pisîk', 'Li Geliyekî', 'Ay Lê Gulê', 'Gelawêj', 'Qefes' û 'Havîn î'.
Mehmet Atli, Murat Ozturk û Serdar Keskîn ne komekî bin jî ev demeke dirêj e bi hev re kar dikin, hunereke xweşik pêşkêş dikin. Wan "Têlkarî" ku zêdetir enstrumantal e derxistibû ser dikê û çend caran konser dabû. Di vê albumê de jî bi aranjoriyê her sêyan mohra xwe li albumê daye.
Album bi muzîkekeke serketî, bi xwendineke narîn hatiye pêşkêşkirin, dengek evînî lê hatiye barkirin. Atli stranên balkêş hilbijartine, rih daye helbestên navdarên kurdan. Ji Cegerxwîn girtiye "Pismamo", "Name"ya Evdila Pêşew pêşkêş kiriye û "Li Geliyekî" ya Arjen Arî girtiye û guhdar birine geliyê. Her wiha strana "Ay lê gulê" ku gotinên wê aîdê Rêcnber in û muzîk aîdê Mihemed Şêxo ye jî di albumê de hatiye xwendin.

Diyar vê carê dibêje "Natirsim"

Hunermend Diyar bi dehan salan e rih dide stranên kurdî. Heta niha dengê wî li seranserê bajarên kurdan belav bûye, albumên wî hatine hembêzkirin. Vê carê ew dibêje "Natirsim" û albuma xwe ya nû pêşkêş dike.
Di albumê de ji bilî "Lê lê Bêmal" a gelêrî ku Eyşe Şanê berê gotibû, stranan "Çiyayê Nurhaq" a Hamît Ertaş û "Meverme Zeriya Min" a Suleyman Gunyelî stranên din gotinên wê aîdê Diyar bi xwe ne.
Diyar bi "Gundê me" guhdaran dibe gundên ku hatine valakirin, bi "Natirsimê" serî hil dide, "Ax lê dayê"yê diyarî dayika xwe dike. Ew bi "Keçika Metê" dil ber dide keçikê, bi "Çiyayê Nurhaq" sîmgeyên cihêreng pêşkêş dike.
Wekî hemû albumên xwe Diyar di vê albumê de jî straneke bi tirkî xwendiye: "Pîro".
Di albuma Diyar ku aranjoriya wê Yaşar Başozdeş kiriye de stranên wekî 'Gundê Me', 'Natirsim'. 'Keçika Metê', 'Çiyayê Nûrhaq',  'Ax Lê Dayê', 'Zalim Yarê', 'Nikarim Bi Vî Dilî', 'Lê Lê Bêma', 'Yar Nakene', 'Meverve Zeriya Min', 'Pîro', 'Husna', 'De Were', 'Tu Nahatî'.

Wekî gotina dawî her sê album jî ne ji rêzê ne, bi deng û muzîka xwe, bi pêşkêşkirina stranan a cureyên cihêreng balê dikişînin û hêjayî guhdarîkirinê ne.

***

Bi şertê nîşandayîna çavkaniyê her kes dikare nûçe û nivîsên Diyarnameyê bikar bîne. Bêyî nîşandayîna çavkaniyê bikaranîna nûçe û nivîsên Diyarnameyê qedexe ye.