Diyarname

Helbestvan Berken Bereh bi pirtûkek din derket pêşberî xwendevanên xwe. Berken Bereh vê carê li ser evînê helbestên xwe rêstine.

Berken Berehê ku wekî helbestvanê “êş”ên civakî dihête nasîn vê carê daye dû êşa işqê. Lê ew işqa daye dû ne ya wî, lê ya her kesî ye. Ango wekî têgeh işq kiriye mijara xwe û xwestiye di ser işqeke takekesî re têgeha işqê şirove (çi metafîzîkî, çi beşerî) bike. Ew ne tenê derdikeve rêwîtiyeke bidestxweveanîna xweşikî û spehitiyê her wiha dixwaze bi me bide zanîn ku jiyan hewldana afirandina spehîtiyê ye ku jê re işq tê gotin. "Ji Dûriyê Re", helbesta vê rêwîtiya bêdawî ya afirandina heyîn û hebûna xwe (işqê) ye ku tu carî mirov nikare bi encam bike.

Nivîskarê Diyarnameyê û helbestvan Berken Bereh di helbesteke xwe ya ji "Ji Dûriyê re" de wisa dibêje: "

têgihîştim,

ku eşq 

wareke bê wext

û deryayeke pêl bi pêl e

ku tenê li peravên wê

dikarî bikî 

geşt û seyranê"

Berken Bereh, bi ferhenga xwe ya mişt kurdî û deng û awaza xwe ya vehesîner, xwendevanan derdixe rêwitiya “işq”ê ya her kes hewceyî wê ye. 

Berken Bereh kî ye?

Helbestvan Berken Bereh di sala 1954'an de li Şirnexê hatiye dinê. Heta niha ev pirtûkên wî derketine:

Êş, 2001, Sî, Helbest

Şagirtên Evînê, 2003, Sî, Helbest

Pandomîm, 2006, Belkî, Helbest

Şîna Helbestê, 2008, Doz, Helbest

Dilê min palgeh e ji işqê re (digel pirtûkên bi navê Şerbeta ji Êgir û Hakiyê), 2011, Lîs, Helbest

Hemû Berhem, 2011, Lîs,  Helbest

Ji Dûriyê Re, 2013, Lîs, Helbest

Bereh du jî pirtûk wergerandine "Lapis Lazuli/Mehmet Altun,2012, Babil" û "Denizin Soyledigi/Gotina Deryayê ye/Mustafa Koz/2012, Lîs" 

Ji Dûriyê Re / Berken Bereh / Helbest / 93 rûpel / Weşanxaneya Lîs