ENQERE

Hevserokê Giştî yê BDP'ê Selahattîn Demîrtaş û Wekîla Serokên Koma BDP'ê Pervîn Bûldan li Îmraliyê bi Rêberê PKK'ê Abdullah Ocalan re hevdîtin pêk anîn û ji Îmraliyê vegeriyan.

Heyetê daxuyanî neda, lê Navenda Giştî ya BDP'ê peyameke li ser navê heyetê weşand. Di peyamê de tiştên ku Ocalan anîbûn zinan bi kurtahî hatin pêşkêş kirin. Li gor daxuyaniya BDP'ê Ocalan di hedîtinê de wisa gotiye: “Baweriya min ev e ku pêvajoya diyalogê ku salek berê me dabû dest pê kirin êdî veguhere formeke nû, yanê veguhere muzakereyeke biwate, gurtir bibe û bidome. Ji bo muzakereyeke bi wate çi divên min pêşkêşî dewletê jî, Qendîlê jî kirin. Bi taybetî dewlet ji bo muzakereyeke xurtir divê amûrên pêdivî pê hene çêbike ku ev yek pêdiviyeke lezgîn e. Rêyên ku ber bi çareseriyê ve herin encax dikarin bi vî awayî çêbibin. Ez hêvî dikim hikumet jî bi awayekî cidî nêzî vê mijarê bibe.

Ez dixwazim bibêjim ku ez wateyeke girîng didim şerawestina ku her du alî didomînin. Em hemû dizanin ku pêvajo gelek bi wate ye. Lê bi qasî ku bi wate ye em hemû dizanin dê gelek zor û dijwar derbas bibe. Di çarçoveya pêşniyar û fikrên min de ger em zehmetiyan li dû xwe bihêlin, emê bikaribin bi muzakereyeke xurt, bi formek nû pêvajoyê bidomînin.

Bi girêdana xwe ya aştî, demokrasî û azadiyê ez silav û hurmetên xwe pêşkêşî her kesî dikim.”