STENBOL

BDP, di çarçoveya mafên xwe yên huqûqî de li dijî Facebookê ku li ser daxwaza dewleta Tirk malperên siyasetmedar û saziyên kurdan girtin, dest bi kampanyayeke navneteweyî dike.

Li dû daxuyaniya dîrektorê Ewropayê yê Facebookê Richard Allan ku di rojnameya Radîkalê de hat weşandin û got, "Me malperên mijara gotinê, ji ber ku pesnê rêxistina di lîsteya terorê de ne dikirin, girt" BDP'ê dest bi kampanyayekê dike. Hiqûqnasên BDP'yî li ser rê û rêbazên hiqûqî yên li dijî Facebookê radiwestin.

Li gorî agahiyên hatin bidestxistin, der barê "biryara girtinê" de wê li rayedarên payebilind ên Facebookê yên li paytexta Îrlanda Dûblîn û navendên li Amerîkayê îtîraz were kirin û ji rayedaran bê xwestin ku biryara girtinê betal bikin. Eger ev biryar neyê rakirin, wê ji bo rayedaran bê gotin ku ew dê serî li rêya tazmînatê bidin.

Eger Facebook bersiveke neyînî bide van giliyan, wê BDP di çarçoveya mewzûata hiqûqî yên welatên navendên Facebookê lê ne, serî li rêyên qanûnî bide. Her wiha ji bo sererastkirina biryarê wê der heqê Facebookê de li qada navneteweyî kampanya were destpêkirin. Ev kampanya wê ne bi rêbaza "boykot" an jî "çalakiyan" be. Wê kampanyaya bilêvkirina şaşiya biryarê be.