STENBOL

Şaredarê Serêkaniya ser xetê yê BDP'yî Îsmaîl Arslan, têkiliya AKP'yî û çeteyên El Nûsra, bi wêneyekî "rûken" raxist ber çavan. Arslan di civîneke çapemeniyê ya li Stenbolê de wêneyê di destê xwe de nîşan da û got, "Ev sûc e. Li otêl û malên polîsan, ev vehewandin. Hingî şerê bi PYD'ê re li holê nebû. Lê hê ji sînor tên derbaskirin, tên xwedîkirin û parastin."

Meclisa Aştiyê ya Tirkiyê, der heqê bûyerên li rojavayê Kurdistanê û Sûriyê diqewimin de, li Salona Civînê ya Cezayîr a Taksîma Stenbolê, civîneke çapemeniyê lidar xist.

Di civîna çapemeniyê de Berdevkê Meclisa Aştiyê ya Tirkiyê Hakan Tahmaz, rojnamegerê kurd ê ji Rojava Berzan Îso, Akademîsyen Erhan Kelleşoglû, penabera ji Rojava Fehîme Mûhammed Elî û Şaredarê Serêkaniya Serxetê Îsmaîl Arslan amade bûn.

Hakan Tahmaz mafê destpêkê yê axaftinê wergirt û got, "Li Misrê, darbeya leşkerî komkujiya herî hovane ya salên dawî dike. Mirovahî ezmûnên mezin dide. Yek ji van ezmûnan jî li Rojava tê jiyîn. Ev şer, bi awayekî cidî gefê li aştiya Tirkiyê dixwe."

Tahmaz da xuyakirin ku di demeke çarenûsa tevahiya welatên herêmê dibe yek de, helwesta Tirkiyê di mijara aştiyê de rê li ber pirsgirêkên cidî vedike û destnîşan kir ku nêzîkatiyek li hundur hewl dide pirsgirêka Kurd çareser bike, lê li derve hewl dide Kurdên li Rojava têk bibe, polîtîkayeke ne rast e û nayê meşandin.

DU MEXDÛRIYET HENE

Li dû axaftina Tahmaz, Şaredarê Serêkaniyê yê BDP'yî Îsmaîl Arslan mafê axaftinê wergirt û bal kişand ser êrîşên çeteyan.

Arslan wisa got: "Li holê du mexdûriyet hene. Di navbera me de rêyeke hesinî heye. Her topa li aliyê din ê xetê dikeve, bandorê li xizmên wan ên li vî aliyê xetê dike. Wekî din, fîşekên pengizîn an jî fîşekên bi armanca provokasyonê hatin teqandin, li vî alî 4 kes kuştin û rê li ber birîndarbûna gelek welatiyan vekir. Li navçeyê, tu dikan nemane fîşek lê neketine. Eniya El Nûsra guleyan li navçeyê direşîne. Hê beriya du rojan, guleya karnasê li odeya veterînerên me ket. Ji çar miriyan 2 jê ereb, 2 jê jî kurd in."

EV SÛC E

Arslan da xuyakirin ku hewl tê dayîn di navbera gelan de rewşeke şer bê afirandin û got, "Li Serêkaniya Serxetê, her erebekî birîndar dibe li hemberî kurdan dibe xwedî hêrs, her kurdê birîndar dibe bi hêrs li ereban dinêre." Arslan di axaftina xwe de bal kişand ser wêneyekî di destê xwe de ku di wêneyê de Berendamê Şaredariyê yê AKP'ê hebû. Arslan ev wêneyê ku yê AKP'yî û endamên El Nûsra ligel hev poz dane, nîşan da û got, "Ev sûc e. Ev li otêlan, li malên polîsan hatin vehewandin. Hingî şerê bi PYD'ê re li holê nebû. Lê hê ji sînor derbas dikin, li hin deveran wan xwedî dikin û diparêzin. Niha Serêkaniya Serxetê êşa pevçûna Ereb-Kurdan dijî, dinale."

YÊN SILAVÊ DIDIN PYD'Ê DÎL DIGIRIN

Rojnameger Berzan Îso jî, çavdêriyên xwe yên li ser Rojava ragihand. Îso got, "Li Til Xelef 20 hezar Kurd dijiyan, diman. Dor li vî gundî girtin û êrîş kirin. El Nûsra zextê li gel dike ku ji gund koç bikin, wan dikujin. Em aqûbeta dîlgirtiyan nizanin."

Îso diyar kir ku rejîm li hemberî komên El Qaîdeyî bêdeng dimîne û got, "Bi sedan mirov, bi tenê ji ber silav dane PYD'ê dîl girtin. Piraniya van jî radestî dadgehên şerîatê kirin."

Îso ragihand ku çapemeniya ereb jî, zêdebûna pevçûnên demên dawî bi bahaneya "projeya cihêkar" a kurdan û PYD'ê rave dike û got, "Ev bahane, ji kiryarên El Nûsra xerabtir e. Ji bo şerê Ereb-Kurdan derxînin, çi ji destê wan tê dikin."

BIRÇÎBÛN Û TIRS

Penabera rojavayê Kurdistanê Fehîme Mûhammed Elî ku berî 9 meh û nîv ji ber êrîşan ji Rojava derbasî Serêkaniya Serxetê bûye got, "Wekî jinên kurd, me gelek tişt ji destê rejîma Esad kişandin. Bi taybetî jî di warê aborî de. Ji bo jinan ne huner hebû ne jî zîreet. Gelek mirov bê nasname bûn. Zarokên me bi salan bê nasname man. Îro jî, li Rojava jin û zarok xwe bi rêxistin dikin."

Elî got, "Wekî gelê Serêkaniyê, me gelek mirovên ji cihên cuda hatin li mala xwe vehewandin, me xwestin her tiştên xwe bi wan re parve bikin. Rejîmê ji bo van mirovan tu tişt nekir. Ligel hemû kêmasî û pirsgirêkan jî, me ya di destê xwe de bi wan re parve kir. Ji bo em dengê xwe ji rejîmê re bidin bihîst, em daketin qadan."

Elî got, "Êdî hêdî hêdî sîmsariya jinan derket holê. Alîkarî her diçe kêm dibe. Gelê Serêkaniyê êdî dixwaze em ji vê derê biçin. Em di nava birçîbûn, tirs û xizaniyê de ne."

DIVÊ ALÎKARIYA JI BO ROJAVA ÊDÎ BI DESTÊ DEWLETÊ BÊ KIRIN

Akademîsyen Erhan Keleşoglû li civînê peyivî û got, "Drameke mirovahiyê tê jiyîn. Têkoşîna navbera hêzên emperyal ên li qada navnetewî, Rojhilata Navîn veguherand qada şer. Mixabin ew dewlemendiya mezin a di binê Rojhilata Navîn de heye, mîna bombeyekê li gelan vegeriyaye."

Keleşoglû got, "Di dema gotûbêj û hevdîtinan de, li derve hiştina PYD'ê nayê qebûlkirin. Divê hikumet têkeve nava hewldaneke cidî. Pêwîste alîkariya ji bo Rojava êdî yekser bi destê dewletê bê kirin."

Keleşoglû axaftina xwe wiha dewam kir: "Mirovên li her du aliyên sînor, xizmên hev in. Ev sînorê navbera gelan, ji aliyê hêzên emperyal ve hatin xêzkirin. Divê em li rêya aştiya navbera gelan bigerin. Wekî gelên Tirkiyê, divê em piştgiriya xwe xurtir bikin û çareseriyê ji hikumetê re nehêlin."